Դեռ երկու ամիս առաջ վարժարան էին դիմել ամերիկյան «Գլոբալ ֆլայթ» կազմակերպության ներկայացուցիչները՝ առաջիկայում Հայաստան այցի կազմակերպչական հարցերում աջակցության համար: Կազմակերպության նախաձեռնած ծրագրի շրջանակներում աշխարհի տարբեր երկրներում իրականացվում է տիեզերագնացության և ավիացիայի պրոպագանդում: Հայաստան ժամանած նախաձեռնող խմբին միացել էին ամերիկացի աշխարհահռչակ տիեզերագնաց Բազ Օլդրինը, ով Նեյլ Արմսթրոնգի հետ «Ապոլլոն 11» -ի կազմում ոտք է դրել Լուսին, և հայազգի օդաչու, ապագա տիեզերագնաց Էդվին Սահակյանը: Ի դեպ, վերջինս լինելու է ՀՀ քաղաքացիություն ունեցող առաջին հայ տիեզերագնացը: Քվանտականները հյուրերին մեծ ոգևորությամբ և անհամբերությամբ դիմավորեցին օդանավակայանում, իսկ օգոստոսի 2-ին «Քվանտի» դահլիճը լեփ-լեցուն էր աշակերտներով, նրանց ծնողներով, ուսանողներով, մարդկանցով, ովքեր հետաքրքրված են տիեզերագնացությամբ և այն ամենով, ինչ կատարվում է Երկիր մոլորակից դուրս: «Գլոբալ Ֆլայթ» կազմակերպության ներկայացուցիչ Ջուդի Ռայսը ներկաներին պատմեց կազմակերպության կրթական ծրագրերի և նպատակների մասին: Հնչեցին բազմաթիվ հարցեր աշակերտների կողմից: Ներկաների շարքում էր նաև Հայաստանում ԱՄՆ-ի դեսպան Ռիչարդ Մ. Միլս Կրտսերը, ով իր խոսքում նշեց, թե ինչպես է դեռ հեռավոր 1969 թ. Արմսթրոնգի և Օլդրինի սխրանքն իրեն ոգեշնչել՝ հասնելու իր երազանքներին: Նա նաև իր ուրախությունը հայտնեց «Քվանտ» այցելելու ընձեռված հնարավորության համար: Ներկաներն անչափ տպավորված էին հանդիպումից: Իր եզրափակիչ խոսքում կենդանի լեգենդ Օլդրինը հորդորեց երիտասարդներին. «Հետևե՛ք ձեր երազանքներին, մի՛ թողեք ձեզ կանգնեցնեն: Եվ հիշեք՝ Երկիր մոլորակը մեր մեկնակետն է, բայց ոչ վերջին կանգառը»: