Ո՞Վ Է ԻՐԱԿԱՆՈՒՄ ԱՆԴՐԱՆԻԿ ՔՈՉԱՐՅԱՆԸ
1993-ին ինչպես էր ապրում Հայաստանը և Արցախը, բոլորս գիտենք. Ինչպես ապրեց Գյումրին, շատերը չգիտեն կամ մոռացել են: Վազգեն Սարգսյանի թեթև ձեռքով նույն թվականին Քոչարյան Անդրանիկի զինված հրոսակախումբը ներխուժեց քաղաք: Ա. Քոչարյանը նշանակվեց կառավարության լիազոր ներկայացուցիչ Շիրակի գոտում: Շատ-շատ գյումրեցիների նման (չհաշված այն օրերի պնակալեզներին-սրանց կանդրադառնամ հաջորդիվ), ինձ համար էլ ամենանողկալի ժամանակահատվածը ոչ թե աղետից հետո էր, այլ 1993-96 թվականները՝Գյումրեցիների օկուպացման տարիները: Պատկերացրեք զինված մաուզերիստների շքախումբը քայլում է Գյումրու ավերակ-ամայի փողոցներով, որտեղ ուրվականի նման անցնում են վշտի մեջ կորսված հատուկենտ մարդիկ՝ վերացած աշխարհից ու իրականությունից… Խմբի առջևից քայլում է Անդրանիկ Քոչարյանի «համհարզը» ՝Անդրանիկ Արշակյանը, զինվորական թանկարժեք համազգեստով և զինված «Մակարով» ատրճանակով, հետո գալիս է ինքը՝ Գլխավոր մաուզերիստը, հետո՝ «Կոբալ» Անդոն, հետո՝ Մռդոն, հետո՝ խելոք ու խոնարհ Միքայել Վարդանյանն ու Մուշեղ Սաղաթելյանը: Ինչի՞ համար էր այս զինվորական մասխարան. Հանճարեղ Չարենցի «Խմբապետ Շավարշի» հերոսները կարծես հարություն էին առել ու լցվել Գյումրի: Աղետի սարսափներից խելագար ժողովրդի ինչի՞ն էր այս մասխարան: ԱԳՌԱՎՆԵՐԸ ՀԱՎԱՔՎՈՒՄ ԵՆ ԱՅՆՏԵՂ, ՈՐՏԵՂ ԼԵՇՆ Է… Այս ամենի բեմականացման պատճառը մեկն էր. ՄԵԾ ԹԱԼԱՆԸ սկսելուց առաջ հրոսակախումբը ապահովում էր վախի մթնոլորտ, որ որևէ մեկը հանկարծ ծպտուն չհաներ: Ոհմակը դուրս էր գալիս գիշերով՝ ուսումնասիրելու կուտակված շինանյութը, շինտեխնիկան, վառելիքը: Առաջին երևելի պատառը Երևանյան խճուղու աջ կողմում ամբարված շինանյութն էր, որը այդ ժամանակի տարածաշրջանային ոստիկանապետ Մուշեղ Սաղաթելյանի ուղեկցությամբ ավտոշարասյունով հանվեց Գյումրիից: Հետագայում Շիրակացի փողոցում փոխհրաձգությունը Անդրանիկ Քոչարյանի և Մուշեղ Սաղաթելյանի միջև այդպես էլ մնաց մեզ անհայտ: Ափսոս, այսօր Մուշեղը անգիտակից է և գամված անկողնուն, այլապես նախապատմությունը կիմանայինք հենց իրենից: Ի միջիայլոց, շատերը, ովքեր այդ տարիներին համագործակցել են Անդրանիկ Քոչարյանի հետ կա՛մ մահացել են, կա՛մ կորցրել են հիշողությունը: Քոչարյանի առաջին հպատակներից թիվ մեկը Մարտին Զելֆիմյանն էր, ով զբաղեցնում էր Հարկային ծառայության պետի պաշտոնը. «Ցավալի» մի լուր Անդրանիկ Քոչարյանի համար. Մարտին Զելֆիմյանը ևս կորցրել է հիշողությունը. Գուցե այցելե՞ք նրան, Ձեզ հաստատ կհիշի…Ավելի շուտ չի համարձակվի չհիշել… Իսկ որտե՞ղ է Ա.Ք.-ի «համհարզ» -ը՝ Անդրանիկ Արշակյանը. Հո չի՞ մահացել: Երկաթգծի շինարարության վարչության պետ, երջանկահիշատակ Լյովա Մադոյանի և օգնության նպատակով եկած՝ նրա պահեստավորած շինանյութի թալանի և նրա մահվան մասին՝ հաջորդ հոդվածում… Հաջորդ հոդվածում, Սիրելի՛ ընթերցող, Ձեզ կներկայացնեմ նաև Մարգարով-Չիֆթալարյան-Պոլոնսկի-Ա.Քոչարյան քառյակի և աղետի գոտուց շինտեխնիկայի առևանգման մասին: Հ.Գ. 2019թ. հունվարի 18-ին Անդրանիկ Քոչարյանը ընտրվեց ՀՀ ԱԺ պաշտպանության և անվտանգության հարցերի մշտական հանձնաժողովի նախագահ: Ենթադրենք, ԱԺ-ում կենսագրություն չունեցող ջահելները չէին ճանաչում «հրեշին», պարոնայք ԱԺ պատգամավորներ Վարդան Ղուկասյան և Վարդևան Գրիգորյան Դուք հո գիտեիք ով է Անդրանիկ Քոչարյանը, բայց լռեցիք, կարծեմ թե նույնիսկ քվեարկեցիք նրա օգտին: Լավ չէ…Ավելի անկեղծ՝ վատ է… Ոչ մեկը Գյումրեցու արյան գինը չի մարսել… Շարունակելի…. Հասմիկ Մելքանյան Գյումրի |
