Սմարթ ուղին բռնած մարզում Լոռու մարզպետի հանձնարարությամբ դպրոցներում շարունակվում են սմարթ դասարանների կառուցումն ու կահավորումը, շարունակվում է նաև հեռավար դասընթացների կազմակերպումը:
Այս անգամ մի հետաքրքիր նախաձեռնություն էր ցուցաբերել ՀՀ Լոռու մարզի Վանաձորի Ա. Պուշկինի անվան № 4 հիմնական դպրոցի տնօրեն Հ. Խումարյանը՝ որոշելով դպրոցի ուսուցիչների մասնակցությամբ մեկ ամբողջ դասընթացային օր անցկացնել Գյուլագարակի միջնակարգ դպրոցի 8-րդ դասարանում: Տեղեկատվական տեխնոլոգիաների կիրառմամբ տեսադասեր անցկացվեցին «Աշխարհագրություն» /Հ. Խումարյան/, «Հայոց լեզու» /Հ. Բաղդասարյան/, «Հանրահաշիվ», «Երկրաչափություն» /Լ. Քառյան/, «Ֆիզիկա» /Վ. Մարտիրոսյան/, «Անգլերեն» /Լ. Կարապետյան/ առարկաներից:
Աշակերտներն ակտիվորեն մասնակցեցին բոլոր դասերին՝ հաճելիորեն զարմացնելով դասավանդող ուսուցիչներին: Երեխաները տպավորված էին հաճելի նախաձեռնությամբ և խնդրեցին, որ նմանատիպ դասընթացային օրեր հաճախակի կազմակերպվեն:
Դպրոցի տնօրենները որոշեցին, որ հաջորդ անգամ Վանաձորի № 4 դպրոցում մեկ ամբողջական օր կանցկացնեն Գյուլագարակի դպրոցի մասնագետները, այսպիսով նաև փորձի փոխանակում կկատարվի:
