Ռուսաստանի Չելյաբինսկի մարզի իշխանությունները գնահատել են երկնաքարի անկման հետեւանքով առաջացած վնասի չափերը: Նահանգապետ Միխայիլ Յուրեւիչը հայտարարել է, որ ընդհանուր առմամբ վնասը գնահատվում է 1 մլրդ ռուբլի:
Մարզի առողջապահության նախարար Մարինա Մոսկվիչեւան հայտարարել է, որ երկնաքարի անկումի հետեւանքով տուժել է 985 մարդ, որից 204-ը` երեխա: 43 մարդու, այդ թվում` 13 երեխայի, անհրաժեշտ է եղել հիվանդանոց տեղափոխել: Երկու հոգու վիճակը ծանր է գնահատվում:
Երկնաքարի անկման արդյունքում տուժել են բազմաթիվ շենքեր, այդ թվում` Չելյաբինսկի ցինկի գործարանը, հիվանդանոցներ, տարբեր հաստատություններ:
Փետրվարի 15-ին երկնքում վառ բռնկումն ու պայթյունը նկատել էին Չելյաբինսկի, Սվերդլովսկի, Տյումենի, Կուրգանի մարզերի բնակիչները: Եկատերինբուրգի աստղադիտարանի տվյալներով` երկրի մոտով անցել է աստերոիդը` երկնաքարային անձրեւ առաջացնելով: Որոշ գիտնականներ էլ կարծում են, որ Չելյաբինսկի երկնքում երկնաքար է պայթել:
Ոստիկանները հայտնաբերել են երկնաքարերի երեք խոշոր կտորների անկման վայրերը. դրանցից երկուսը Չելյաբինսկի, մեկը` Զլատոուստովսկի շրաջանում են ընկել:
