Բաքվում սպասվում է Ուկրաինայի նախագահ Պյոտր Պորոշենկոյի այցը։ Այս մասին լրագրողներին հայտնել է Ադրբեջանում այդ երկրի դեսպան Ալեքսանդր Միշչենկոն։ Նա չի հայտնել այցի ամսաթիվը՝ փոխանցում է Trend գործակալությունը։
«Մենք չենք ցանկանում, որպեսզի դա պարզապես լինի այց հանուն այցի, մենք ցանկանում են դրական արդյունքներ, այդ իսկ պատճառով ընթանում է նախապատրաստական աշխատանք», - ասել է դեսպանը։
Նրա խոսքով՝ Ուկրաինան նույնպես շարունակում է աշխատել Ժողովրդավարության և տնտեսական զարգացման կազմակերպության (GUAM) գործունեությանը խթան հաղորդելու ուղղությամբ։
Դեսպանի խոսքով՝ կազմակերպության բոլոր երկրներն ունեն համընդհանուր խնդիր։ «Մենք պետք է ընտրենք տարածքների վերականգնման համար շարժման հայեցակարգ։ Մենք սպասում ենք Ժողովրդավարության և տնտեսական զարգացման կազմակերպության նոր ղեկավարին։ Մենք գիտենք, որ այդ պաշտոնին հավակնում է Ադրբեջանը, և մենք աջակցում ենք դրան», - ասել է դեսպանը։
Ադրբեջանի և Ուկրաինայի միջև ապրանքաշրջանառությունը 2015-ի առաջին եռամսյակի արդյունքներով կազմել է 82.6 մլն դոլար, ինչը 27.9 տոկոսով քիչ է 2014-ի նույն ժամանակահատվածի ցուցանիշից։
