Հայաստանի ֆուտբոլի ազգային հավաքականի հարձակվող Էդգար Մանուչարյանն ազատվեց պարտադիր զինվորական ծառայությունից: Այս մասին որոշումն ընդունվեց ՀՀ կառավարության այսօրվա նիստում:
Որոշման ընդունումը պայմանավորված է 2014 թվականի ֆուտբոլի Եվրոպայի առաջնության նախընտրական փուլերին Էդգար Մանուչարյանի մասնակցությունն ապահովելու անհրաժեշտությամբ։ Մանուչարյանն աչքի է ընկնում արդյունավետ խաղով, և ՀՀ սպորտի և երիտասարդության հարցերի նախարարությունը կարևորում է նրա մասնակցության ապահովումը ֆուտբոլի հավաքական թիմի սպասվելիք խաղերին։ Մանուչարյանին պարտադիր զինվորական ծառայության զորակոչից տարկետում էր տրվել մինչև 2013 թվականի գարնանային զորակոչը:
«Քանի որ վերջինիս 27 տարին լրանում է 2014 թվականի հունվարի 19-ին, հնարավոր չէ նրան պարտադիր զինվորական ծառայության զորակոչից տարկետում տալ կամ երկարաձգել տարկետման ժամկետը։ Հետևաբար, անհրաժեշտություն է առաջացել ազատել նրան պարտադիր զինվորական ծառայությունից»:
Նշենք նաև, որ կառավարությունը Հայաստանի ֆուտբոլի մինչև 19 տարեկանների հավաքականում հանդես եկող Արմեն Մանուչարյանին, Էդգար Բաղումյանին և Անդրեյ Շահգելդյանին ևս տարկետում տվեց մինչև 2016 թվականի գարնանային զորակոչը:
