Եվս մեկ օր ու ևս մեկ կարևոր իրադարձություն:
Փետրվարի 17-ին Ներքին Դվինի սբ. Հարություն եկեղեցում կազմավորվեց «Հայորդի» պատանի լրագրողների ակումբը, որի հիմնադիր անդամներն են` Անուշ Ասլանյանը, Լարիսա Ղազարյանը, Հասմիկ Փիլոյանը, Մանե Հակոբյանը, Մարիա Առաքելյանը, Ռուզաննա Կիրակոսյանը և Վարդան Գեղամյանը:
Նրանք կլուսաբանեն համայնքում և թեմում կատարվող նշանակալից հոգևոր, մշակութային միջոցառումները:
Համայնքի հոգևոր հովիվ տեր Եղիշե քահանա Նուրիջանյանը, օրհնելով նորաստեղծ խմբակի անդամներին, մաղթեց նրանց արդյունավոր գործունեություն` ի նպաստ թերթի ընթերցող հայորդիների հոգևոր կյանքի զորացման, բարոյական նկարագրի հղկման, ազգային ու հայրենասիրական ոգու պահպանման:
Նրանց առջև տեր հայրը առաջին խնդիրը դրեց` ակնարկ-դիմանկարներ պատրաստել Արցախյան գոյամարտի բովով անցած մեր ազատամարտիկների մասին:
Մենք` լրագրողական ակումբի պատանիներս, արդեն հասցրել ենք մի շարք ակնարկներ գրել, որոնք թերթի ինչպես այս, այնպես էլ առաջիկա համարներում մեր սիրելի բաժանորդները ընթերցելու հնարավորություն կունենան:
Մենք լեցուն ենք ստեղծագործական ավյունով, ինչի արգասիքը շուտով առիթ կունենաք ինքներդ տեսնել «Հայորդի» թերթի էջերում:
Մանե ՀԱԿՈԲՅԱՆ
«Հայորդի» լրագրողների ակումբ
«Հայորդի» երիտասարդական, հոգևոր, մշակութային ամսաթերթ: Թիվ 2, փետր 2017թ.
https://www.facebook.com/profile.php?id=100015880478066&ref=ts&fref=ts