Այսօր գրավաճառների գործունեության արգելմանն ու նրանց տեղափոխման դեմ արտահայտվող ուսանողների հետ «Արմատ» ակումբում կայացած ասուլիսում հայտնեց նախկինում «Երիտասարդական» մետրոյի գետնանցումում աշխատող գրավաճառ Գարիկ Մարտիրոսյանը: «Մենք չենք ուզում բացօթյա առևտուր անել: Մենք խնդրում ենք քաղաքապետին փակ տարածք հատկացնել, որտեղ գրքի շուկա կգործի», -ասուլիսում հայտնեց գրավաճառն ու հավելեց, որ իրենց հատկացվել է տարածք կամ Մաշտոցի գետնանցումում կամ Մարգարյան հիվանդանոցի գետնանցումի տարածքում: «Այդ տարածքները փոքր են, անհարմար և հեռու են բուհերից», -ասուլիսում ասաց «Արատտա» երիտասարդական շարժման հիմնադիր Հովհաննես Բասենցյանը: Ուսանողական շարժումը մտահոգ է այս խնդրով և պատրաստվում է բաց բողոք-նամակով ներկայանալ կառավարություն և քաղաքապետարան: Երիտասարդները պահանջում են գրավաճառներին ժամանակավոր տարածք հատկացնել Օպերայի շենքում կամ Հանրապետության հրապարակի գետնանցումում, իսկ որպես մշտական տարածք՝ գրքի տոնավաճառ կառուցել Նալբանդյան փողոցում: Շարժման ներկայացուցիչները նաև հավելեցին, որ այս խնդրով մտահոգված են բազմաթիվ ուսանողներ այլ բուհերից: «Գրախանութներում գրքերը շատ թանկ են, իսկ մենք ուսանողներ ենք ու չենք կարող մեզ շատ թանկ գրքեր թույլ տալ: Կարծում ենք, որ գրքի շուկան անհրաժեշտ է մեզ», -ասաց ուսանողուհի Աստղիկ Գևորգյանը: Գրավաճառությամբ շուրջ 15 տարի զբաղվող Գարիկ Մարտիրոսյանը վերջում հավելեց, որ գրքի շուկան ոչ միայն էժան գրքեր է առաջարկում, այլև փրկում է հազարավոր գրքեր՝ թղթի թափոնների վերածվելուց: