ՀՀ ՊՆ «Արծիվ մահապարտներ» ՀՆԳ մարտիկները, միության համակիր և երիտասարդ թևի անդամների հետ համատեղ հաճախ են կազմակերպում համատեղ ուխտագնացություններ դեպի պատմական հաղթանակների ծննդավայրեր: Տարբեր ժամանակներում, և 20-րդ դարավերջին՝ արդեն իրենց իսկ մասնակցությամբ ձեռք բերված հաղթանակների իրական նշանակությունը և դրանք պահպանելու, շարունակելու կարևորության գիտակցումը առավել ընկալելի է լինում, երբ քայլում ես հենց այն հողի վրա, որտեղ մղվել են այդ ճակատամարտերը, ժամանակի մի բախտորոշ պահի որոշելով Ազգիդ, հայրենի հողիդ ճակատագիրը: Այդ ուխտագնացությունները երբեմն շատ բազմամարդ են լինում, երբեմն՝ ավելի փոքրաքանակ խմբերով՝ միաժամանակ տարբեր ուղղություններով, տարբեր սրբավայրեր:
Մայիսյան հաղթանակները այս ձևաչափով նշվեցին Շուշիում, և Երևանում, Սարդարապատում, Վանաձորում / Ղարաքիլիսա/, Ապարանում /Բաշ-Ապարան/:
Մայիսի 28-ին՝ Բաշ-Ապարանի հերոսամարտի 99-րդ տարելիցին կազմակերպվել էր ավանդական երթը դեպի «Վերածնունդ» հուշահամալիր, այցելություն և ոգեկոչման արարողություն Դրաստամատ Կանայանի /ԴՐՈ/ շիրիմի և հուշարձանի մոտ:
Այստեղ էլ 2016թ. ապրիլյան պատերազմի մասնակից Արծիվ-մահապարտների մի մասին գեներալը հանձնեց Արցախյան պատերազմի կամավորական մասնակիցների նոր վկայականները: Տեղում նրանց միացան և իրենց լիասիրտ երգ ու պարով Արծիվներին ողջունեցին մի խումբ երիտասարդներ, ովքեր, հետո պարզվեց՝ եկել էին Հայաստան հայրենիքին ու հայ գենին նվիրվելու երդում տալու Դրոյի շիրիմի մոտ / տեսանյութերը՝ ՀԿ ֆեյսբուքյան էջում, PN Artsiv mahapart HNG/:
«ԱՐԾԻՎ ՄԱՀԱՊԱՐՏՆԵՐԻ ՄԻՈՒԹՅՈՒՆ» ՀԿ
