2016-2017 ուսումնական տարվան ընդառաջ ՀՀ ԿԳ նախարարության կողմից ուսումնական պլաններում եւ հանրակրթական դպրոցների տնօրենների հավաստագրման կարգում կատարվել են մի շարք փոփոխություններ: Այդ մասին օգոստոսի 25-ին, լրագրողների հետ հանդիպման ժամանակ նշել է ԿԳՆ հանրակրթության վարչության պետ Նարինե Հովհաննիսյանը:
Նրա խոսքով ավագ դպրոցների աշակերտները երկրորդ կիսամյակում հնարավորություն կստանան ընտրել առնվազն 3 առարկա՝ այն առարկաները, որոնք անհրաժեշտ են բուհ ընդունվելու համար:
«Այժմ քննարկվում է նաեւ ավարտական քննությունների կրճատման հարցը: Ամենայն հավանականությամբ ավագ դպրոցում 12-րդ դասարանցիները 6-ի փոխարեն կհանձնեն 3 ավարտական քննություն՝ «Հայոց լեզու եւ հայ գրականություն», «Մաթեմատիկա», «Հայ ժողովրդի պատմություն» առարկաներից: Սովորողները նշված առարկաներից ավարտական քննությունները կհանձնեն դեկտեմբերին, որպեսզի դրանից հետո հնարավորություն ունենան պատրաստվել բուհական քննություններին: Իսկ արդեն երկրորդ կիսամյակում սովորողը նշված երեք առարկաներից որեւէ մեկը, կամ դրանք բոլորը միասին կարող է իր ընտրությամբ ուսումնասիրել, եթե դրանք նրան անհրաժեշտ են միասնական քննությունների ժամանակ», - պարզաբանել է Նարինե Հովհաննիսյանը: