«Գույները շուրջս լիովին փոխում են ամեն ինչ՝ անկախ նկարի սև ու սպիտակ լինելուց»
Նվարդն ասում է, որ իրենից առաջ քույրն էլ լավ էր նկարում, ինքը կարողանում էր նկարել, բայց սկզբում լավ չէր ստացվում՝ փոքր լինելու պատճառով . «Տեսնում էի, որ քույս գեղեցիկ է նկարում, կարելի է ասել, բարի նախանձ եմ ունեցել և դրանից հետո սկսել եմ աշխատել իմ վրա ու սկսեցի ավելի լավ նկարել, ասում են՝ լավ է ստացվում», - անկեղծանում է Նվարդը: Նա դեռ սովորելու տարիներին աշխատել է, սկզբում այցեքարտերի պատվերներ է ունեցել, որը կրկին կապված է եղել դիզայնի հետ, հետո աշխատել է կարի ֆաբրիկայում և սկսել է նկարել շապիկների վրա մինչ այսօր: Միաժամանակ մասնակցել է տարբեր ցուցադրությունների՝ ցուցադրելով իր կարած հագուստները: Հագուստների վրա սկսել է նկարել այն ժամանակ, երբ համալսարանում սկսել են ուսումնասիրել բատիկա առարկան, որի ժամանակ շինֆոնից և մետաքսից շարֆեր էին նկարում, հետո իմացել է, որ կան հագուստի համար նախատեսված պինդ ներկեր, գնել է և սկսել փորձել, հետո նկարել է այն մարդկանց համար, ովքեր ցանկացել են: Նվարդը իր կյանքը չի պատկերացնում առանց նկարելու, նկարում է հիմնականում գիշերները. «Նկարում եմ, երբ նույնիսկ տխուր եմ լինում ու ամեն ինչ մոռանում եմ... Գույները լիովին փոխում են շուրջս ամեն ինչ՝ անկախ նկարի սև ու սպիտակ լինելուց: Նկարել սիրում եմ հիմնականում գիշերները, երբ ինձ խանգարող չկա: Այդպես ոգևորությունս մեծանում է», - ասում է նա: Նվարդը դպրոցական տարիներին մասնակցել է «Բոլորս հավասար ենք» հաշմանդամներին նվիրված նկարչական մրցույթին և հաղթել է հենց նրա նկարը, որը այժմ փակցված է իրենց շրջանի 4 դպրոցներում: «Նկարիս միտքը այն էր, որ բոլոր մարդիկ հավասար են: Անկեղծ ասած, ոգեշնչվել էի աստղագիտության դասագրքի մի նկարից, որտեղ տիեզերքն էր ու հենց այդ դասի ժամին էլ նկարել եմ: Նկարում երկու մարդ էր, մեկը հաշմանդամություն չուներ, մյուսը՝ ակնոցով էր ու օգտվում էր անվասայլակից»: Նվարդը ասում է, որ հիմնականում նկարում է աղջիկներ, անիմացիոն պատկերներ, դժվարանում է նկարել դիմանկարներ, սակայն հիշում է իր նկարած Բոբ Մարլիի նկարը՝ կետերով արված: Չի նկարում աբստրակտ ոճի նկարներ: Նա ավելի շատ օգտագործում է վառ գույներ, հաճախ նաև սևը: Իսկ իր աշխարհի գույնը, ասում է, հենց կանաչ գույնն է. «Կանաչը բնական գույն է, ես հենց այդ գույնից եմ ոգեշնչվում, այդ գույնի բոլոր երանգներով: Այն ինձ ավելի է մտերմացնում բնության հետ»: Ոգեշնչման աղբյուրները տարբեր են նրա համար. «Ոգեշնչվել եմ Սիլվիա Պելիսսերոյից, ով իտալացի նկարիչ է, սիրում եմ նրա նկարելու ոճը: Նաև ոգեշնչվում եմ հայ դիզայներ Գևորգ Շադոյանի գործերով...»: Այժմ նա կարում է նաև շորեր, իսկ վերջերս ուղղությունը դեպի պարարվեսի կողմն է, նկարում է պարուհիների: Նվարդը շատ է ցանկանում, որ մենք՝ հայերս, ավելի մոտենանք արվեստին: Ասում է՝ ինքը դեմ է տեխնիկային ու չի ցանկանում կորի ձեռքի աշխատանքը, ուզում է, որ այն միշտ արդի մնա և գնահատվի... Հույս ունի, որ կգա այն օրը, երբ ինքն էլ ավելի առաջ կգնա այս ոլորտում և ավելի շատ կմասնակցի ցուցահանդեսների... |
Abone ol ve malalelerin yayınla:
