Հոկտեմբերի 17-ին Արճիսի գյուղական կանանց խորհրդի նախաձեռնությամբ էկոակումբի սաների մասնակցությամբ էքսկուրսիա կազմակերպվեց Տավուշի մարզի Զիկատար կոչվող բնապահպանական կենտրոն: Նախապես պայմանավորվածության համաձայն` կենտրոնի աշխատակիցները, տնօրեն Արտավազդ Եգանյանի գլխավորությամբ, սիրալիր դիմավորեցին էկոակումբի պատանի սաներին: Կենտրոնի գիտաշխատող Սեյրան Ազատյանը հանգամանորեն բացատրեց կենտոնի հիմնադրման պատմությունը, նպատակն ու առաքելությունը, ծանոթացրեց բնապահպանական կենտրոնի կառուցվածքին` խորհրդակցությունների սենյակին, գրադարանին և այլն: Այսուհետ կենտրոնի գրադարանի գրքերի շարքը կհամալրեն նաև CENN-ի տրամադրած մի շարք բնապահպանական գրքեր, որոնք կենտրոնին հանձնեց Արճիսի ԳԿԽ համակարգող Արևիկ Անդրեասյանը:
Ճանաչողական էքսկուրսիան շարունակվեց արգելանոցի տարածքում, որտեղ երեխաները ծանոթացան տարածքում աճող ծառատեսակներին ու թփերին: Սեյրան Ազատյանը հետաքրքիր դասախոսություն կարդաց անտառի բնապահպանական խնդիրների մասին: Երեխաները ծանոթացան նաև անտառում օգտագործվող ցուցիչ-չափիչ սարքերի մի մասին և դրանցից օգտվելու կանոններին, ինչպես նաև անտառում ճիշտ կողմնորոշվելու հնարավորություններին, որից հետո տեսականում ստացած գիտելիքները կիրառեցին գործնականում և ծառերի օգնությամբ որոշեցին հորիզոնի կողմերը, չափեցին ծառի բարձրությունը և այլ:
Հագեցած գիտելիքներով ու մեծ տպավորություններով` էկոակումբի սաները երեկոյան վերադարձան գյուղ` իրենց հետ բերելով անմոռանալի հուշեր և ցանկություն հայտնեցին, որ այսպիսի միջոցառումները լինեն հաճախակի ու շարունակական:
Էքսկուրսիան կազմակերպվել էր CENN-ի և Green Lane-ի աջակցությամբ: Էքսկուրսիայի կազմակերպման գործում իրենց ներդրումն ունեցան նաև համագյուղացիներ Ա. Մուսայելյանը, Ա. Զախարյանը, ՏԻՄ ղեկավար Ս. Միկիչյանը:
