Հանրային տարբեր շրջանակներում աջակողմյան ղեկով ավտոմեքենաների շահագործումն արգելելու վերաբերյալ քննարկումները շարունակվում են:
Փորձագետներն արդեն
հայտնել ենիրենց կարծիքն այս խնդրի հետ կապված` նշելով, որ վարորդի ղեկը լինելով աջ կողմում շատ ժամանակ անհարմարություններ է ստեղծում զուտ անվտանգության առումով: Կարծիք կա, թե վթարների մեծ մասը հենց ղեկի աջակողմյան հանգամանքով է պայմանավորված:
MAMUL.am-ի հետ զրույցում այս տեսակետի հետ չհամաձայնեց «Ավտովարորդների պաշտպանության լիգա» ՀԿ-ի նախագահ Տիգրան Հովհաննիսյանը: «Աջ ղեկով մեքենաների վթարները կազմում են 10 % և քանի դեռ ոստիկաննությունը ոչինչ չի հրապարակել, խնդրում եմ մեկնաբանություններ չանել», - հորդորեց նա:
Նա նշեց, որ ցանկացած պարագայում ղեկի տեղափոխումը մի կողմից մյուսն, իրենից վտանգ է ներկայացնում:
«Ղեկ փոխելն է վտանգավոր, մասնագետները դա են ասում... ղեկը փոխել, տանել «սվարկա» անելն է շատ վտանգավոր», - կարծիք հայտնեց մեր զրուցակիցը` տեղեկացնելով, որ վաղը` հոկտեմբերի 17-ին, այդ թեմայով ասուլիս են տալու, որտեղ անհատ տաքսու վարորդների և, առհասարակ, ավտովարորդների մասնակցությամբ կքննարկվեն իրենց հուզող մի շարք հարցեր:
Հիշեցնենք` ՀՀ տրանսպորտի, կապի և տեղեկատվական տեխնոլոգիաների նախարարությունն իր վերջին հայտարարությունում
նշել էր, որ այս պահին աջակողմյան ղեկով տրանսպորտային միջոցների շահագործումը դադարեցնելու, դրանց սեփականատերերի համար պայմաններ սահմանող կամ նրանց իրավունքները սահմանափակող որևէ իրավական ակտ չկա:
