«Ադրբեջանն այս տարի էլ իր առջև խնդիր էր դրել՝ սահմանին ստեղծել լարված իրավիճակ և ցույց տալ ինչպես հենց ադրբեջանական հասարակությանը, այնպես էլ հայ, որ պատրաստ են ռազմական գործողությունների, պատրաստ են պատերազմել հայերի հետ: Դատարկ խոսքեր էին», - Panorama.am-ի հետ զրույցում ասաց գեներալ-մայոր Արկադի Տեր-Թադևոսյանը (Կոմանդոս):
Ըստ Կոմանդոսի, թեև նրանք ունեն մեծ քանակությամբ զենք ու զինամթերք, սակայն ամենագլխավորը՝ադրբեջանական հասարակությունը, բանակը չի ցանկանում պատերազմ, բացի այդ՝ պատրաստ չէ ռազմական գործողությունների վերսկսմանը, որովհետև՝ առաջին հերթին, ադրբեջանական հասարակությունը մասնատված է:
Ինչ վերաբերում է հայկական զինված ուժերին, գեներալ-մայորն ասաց, որ մենք ունենք հերոս զինվորներ, ովքեր իրեն ծառայությունը պատվով են կատարում, ովքեր մշտապես գիտակցում են, որ իրենք հայրենիքի պաշտպաններն են, իրենց պարտքն է պաշտպանել իրենց ծնողներին, քույրերին, սիրելիներին:
«Մեր բանակը մարտունակ է: Դա է վկայում այն, որ մեր զինվորները կարողանում են պայքարել թուրք մասնագետների մոտ հատուկ պատրաստվածություն անցած ադրբեջանցի զինվորների դեմ ու հաղթել, կանգնեցնել նրանց առաջխաղացումը», - ասաց Կոմանդեսը:
Նա որպես ձեռքբերում կարևորեց բանակում միջանձնային հարաբերությունների, հրամանատարների և նրանց ենթակաների միջև հարաբերությունների կանոնակարգումը:
