Идет загрузка...
Сегодня:  Вторник, 07 Мая, 2024 года

Статьи

Գրիգոր Նարեկացի, Տաղ Վարդավառի

Armenak Avetisyan
Автор:
Armenak Avetisyan
12:35, Воскресенье, 27 Июля, 2014 года

ՏԱՂ ՎԱՐԴԱՎԱՌԻ

Գոհար վարդն էր շղարշ առել
     Արփիական վեհ վարսերից,
     Ծավալվում էր հուսկ վերևում, վարսերից վեր,
     Ծաղկածիծաղ ծովն երկնային:

Եվ այդ ծովից համատարած
     Պղպջում էր գույնն այն ծաղկի երփնափողփող.
     Իսկ ճյուղերին հուրհրատում էին հասած
     Պտուղները քրքումնաթույր:

Հուրհրատում էին նրանք սիրասնունդ
     Հովանու տակ խուռն ու առատ տերևների,
     Որ սոսավում էին ինչպես հրաշալի
     Դավթի տավիղն աստվածատուր:

Վարդաստանն էր շողարձակում հազարերանգ
     Ծիծաղածուփ ծաղիկների երփնախաղով.
     Սոսն ու տոսախն էին սփռել այնտեղ բոսոր
     Դալարագեղ ոստերն իրենց:

Նոճիներն ու արոսենին նորաբողբոջ
     Շրշում էին հևքով հուշիկ
     Գգվելով վարդ ու շուշանին.
     Շողշողում էր շուշանն հովտում.
     Շողում էր դեմն արեգակի:

Հյուսիսային հովն հեզասահ
     Հովհարում էր գիրգ շուշանին.
     Հարավային լեռների զով
     Օդն էր ցողում ջինջ շուշանին:

Ու շուշանն է լցվում շաղով,
     Շող շաղով ու շար մարգարտով.
     Արեգնափայլ ոսկի ամպից
     Շաղն է ցողում ծաղկունքն ամբողջ:

Նշմարվեցին հետզհետե
     Աստղերն առկայծ ու դարձդարձիկ,
     Լուսինն առան բույլերի մեջ
     Ու երկնքի բիլ կամարին համատարած
     Հոծ խմբերով շուրջանակի ճառագեցին:

Փա՜ռք Հորը, Որդուն և Սուրբ Հոգուն
     Այժմ և միշտ հավիտյանս հավիտենից:
     Ամեն:

Սբ. Գրիգոր Նարեկացի:

Продвижение этого поста
Статья опубликована в проекте Пресс-секретарь.
Зарегистрируйтесь и опубликуйте свои статьи.
Нравится
1
Не нравится
0
66379 | 0 | 0
Facebook