ԱՄՆ-ի Թեքսաս նահանգի բնակչուհի Օդրին Կարդենասը ծնվել է հազվադեպ հիվանդությամբ. աղջկա սիրտը ձեւավորվել է կրծքավանդակից դուրս: Նման արատը հանդիպում է 8 մլն նորածիններից միայն մեկի դեպքում: Միաժամանակ, նման արատով ծնված երեխաների 90 տոկոսը մահանում է կամ ծնվելիս, կամ կյանքի առաջին օրում: Սակայն Օդրինին մի քանի ժամ տեւող բարդ վիրահատության են ենթարկել Հյուսթոնի հիվանդանոցում, որի արդյունքում երեխան կենդանի է մնացել եւ հիմա վերականգնողական փուլ է անցնում:
Երեխայի մայրը սարսափելի արատի մասին իմացել է 16-շաբաթական հղիության ժամանակ, երբ ուլտրաձայնային հետազոտության է ենթարկվել:
Բժիշկներն առաջարկել են կամ ընդհատել հղիությունը, կամ կրել ու ծնել երեխային, իմանալով, որ նա կարող է մահանալ: Բժիշկներն առաջարկել են նաեւ անցք բացել դեռ չծնված երեխայի կրծքավանդակի վրա, որպեսզի տեղ բացեն սրտի համար:
«Դուք երբեք չեք հասկանա, թե ինչ է զգում մայրը՝ նման որոշում ընդունելով, քանի դեռ ինքներդ չեք բախվել դրան դեմ առ դեմ», -ասել է Կարդենասը:
Օդրինը ծնվել է 5 շաբաթ առաջ: Բժիշկների խոսքով, աղջնակը առաջիկա տարիներին էլի պետք է մի քանի անգամ վիրահատվի:
