Գոնե պատրանքիս տեր-տիրող եղիր,
Որ խեղկատակի պես անվերջ չկաղամ,
Առանց իրական «դու» -ն զգալու`
Անապատներում լացով չսուրամ:
Թագավոր կարգվիր, սին հավատամքիս
Ու կառավարիչ «Մորմոք» դղյակին,
Որ ես էլ ի շահ հաստատուն կամքիս
Իմ տխուր դղյակը հանձնեմ ալիքին:
Գոնե մեկ անգամ տիրակալ դարձիր
Քեզ խորթ տերության, որ դու ես ստեղծել,
Գեթ մի հրաման քեզ գաղութ երկրիս,
Որ ամեն գնով պատրաստ է պարտվել:
Բայց դու չես էլ գա ու չես էլ տիրի
Անտերունչ եղած մի դղյակի,
Որ չունի այգի ու ոչ էլ ծիրանի,
Որ իր իշխանին շուքով զարդարի: