Զանգվածային սպանություն է տեղի ունեցել երկուշաբթի ռազմածովային ուժերի լավ հսկվող հաստատությունում: Պաշտպանական հաստատության աշխատակիցը` մինչև ատամները զինված` սպանել է 12 մարդու և մահացել է ոստիկանության հետ կրակահերթի ժամանակ: Ոստիկանական հատուկ ջոկատները ողջ օրը որոնումներ են անցկացրել տվյալ թաղամասում, որպեսզի հայտնաբերեն հանցագործի մեղսակիցներին և եկել են այն եզրակացության, որ նա գործել է մենակ: Հանցագործության դրդապատճառները ոստիկանությանը առայժմ անհայտ են:
Navy Yard թաղամասում տեղի ունեցած կրակոցները զոհերի թվով դարձան ամենախոշորը` սկսած 2012թ-ի դեկտեմբեր ամսից, երբ Դենդի Հուկ դպրոցում սպանվեց 26 մարդ: Թաղամասը գտնվում է Սպիտակ տնից ոչ հեռու: Զինվորական հաստատություններում այսպիսի զանգվածային դեպք տեղի չէր ունեցել սկսած 2009թ-ից, երբ Ֆորտ Հուդ ռազմաբազայում մահացավ 13 մարդ:
«Ներկայումս մենք չունենք որևէ ապացույցներ այն մասին, որ տեղի ունեցածը ահաբեկչություն է, չնայած որ հետաքննությունը շարունակվում է», - լրագրողներին հայտարարել է Վաշինգտոնի քաղաքապետ Վինսենտ Գրեյը:
Ըստ նրա` ահաբեկչության տարբերակը չի բացառվում, սակայն դեռևս լուրջ հիմքեր չկան այս առնչությամբ: Քաղաքապետը նշեց, որ չի հիշում նման ծավալի սպանության դեպք մայրաքաղաքում:
