"Գյուղի բրենդ" կամ ելք անելանելի իրավիճակից
 Հարց "Հայկական ռադիոյին". հարցերին չենք պատասխանում ... Առաջին հայացքից անելանելի թվացող գյուղերի սոցիալ-տնտեսական վիճակն այսօր իրոք ծանր է: Դրա համար փաստարկներ կարելի է ներկայացնել հատորներով: Այսօր գյուղացին չի կարողանում իր համար կայուն եկամուտ ապահովել գյուղատնտեսական ապրանքների միջոցով: Դրա պատճառները շատ են, սակայն, այստեղ առավել նպատակահարմար է ուշադրություն դարձնել դրանցից մեկին` գյուղատնտեսական ապրանքներ արտադրող խոշոր կազմակերպություններին: Դրանք ավտոմատացված արտադրական գործընթացի են վերածել այն աշխատանքը, որը դարեր շարունակ իրականացվել է գյուղացու կողմից` ապահովելով նրա "օրվա հացը": Արդյունքում այն ինչ պետք է ապահովեր գյուղացու զբաղվածությունը և գյուղի կենսական պայմանները` իրականում ծառայում է խոշոր արտադրողների շահերին: Վերջիններս` օգտագործելով արտադրական բոլոր առավելությունները և մաքեթինգային որոշ գործիքներ, կարողնում են իրենց արտադրանքը ներկայացնել որպես բրենդ և գրավել գյուղատնտեսական ապրանքների ողջ շուկան: Իհարկե ինչ-որ իմաստով սա բնական է և ժամանակի թելադրանք, սակայն այս խնդիրը կարող է և պետք է ունենա լուծման տարբերակներ: "Գյուղի կաթ", "Գյուղի մածուն" "Գյուղի պանիր" ... Առաջարկում եմ ստեղծել պետական ապրանքային նշան "Գյուղի բրենդ": Այս ապրանքանշանի ներքո սպառողին ներկայացվում են տարբեր գյուղատնտեսական ապրանքներ, օրինակ` "Գյուղի կաթ", "Գյուղի մածուն" "Գյուղի պանիր" "Գյուղի ձու", "Գյուղի լավաշ", "Գյուղի մեղր" և այլն: Պետական աջակցությամբ իրականացվում է այս բրենդի ներքո ներկայացվող ապրանքների ցրումը առևտրի հնարավոր բոլոր կետերում: Ապահովվում է նաև դրանց մասին լավագույն ձևով հանրության տեղեկացումը (թողարկվում է կիսով չափ սոցիալական, կիսով չափ կոմերցիոն հոլովակների շարք և հեռարձակվում տարբեր ԶԼՄ-ների միջոցով): "Գյուղի բրենդը" դառնում է պաշտպանված ապրանքային նշան, որը պատկանում է պետությանը: Հաշվի առնելով այն հանգամանքը, որ մեր երկրում մարդիկ վստահում են "պետական արտադրանք" ասվածին և առանձնակի համակարանքով են վերաբերվում տնական կամ գյուղական ապրանքներին, ապա բրենդի առաջխաղացումը պետք է իրականացվի հենց այդ շեշտադրությամբ: "Գյուղի բրենդը" դառնում է մրցունակ Այս նախագիծը կյանքի կոչելու համար գյուղերում ձևավորվում են համապատասխան կառույցներ, որոնք գյուղացուց ընդունում են նրա կողմից ստացվող գյուղատնտեսական ապրանքները: Իր արտադրանքի համար գյուղացին վարձատրվում է նախապես որոշված կարգով: Նպատակահարմար է, որ ծրագիրն իրականացվի գյուղական ապրանքների տեղայնացման սկզբունքով: Այսինքն մի գյուղը կենտրոնացած է ձվի արտադրության վրա, մյուսը` կաթի, հաջորդը մեղրի և այդպես շարունակ: Տեղայնացումն իրականացվում է հաշվի առնելով գյուղերի բնակլիմայական պայմանները, գյուղերում արդեն առկա տնտեսությունները և այլ գործոններ: "Գյուղի բրենդի" հանդեպ հանրության վստահությունը ձևավորելու և ամրապնդելու, ինչպես նաև առողջապահական նկատառումներից ելնելով` ձևավորվում են հատուկ լաբորատորիաներ: Դրանք կատարում են սննդամթերքի լաբորատոր ուսումնասիրություններ` ստուգելու և հավաստելու համար, որ "Գյուղի բրենդի" ներքո ներկայացվող ապրանքատեսակները ոչ միայն անվնաս են, այլ նաև առավել օգտակար: Մրցունակ գյուղմթերք Գյուղերում պետական աջակցությամբ գործող համապատասխան կառույցների միջոցով գյուղացիների հետ տարվում են նախապատրաստական աշխատանքներ: Գյուղացուն հստակ ներկայացվում են բոլոր այն առավելությունները, որ վերջինս ունենալու է այս ծրագրի շրջանակներում պետության հետ համագործակցելով: Նախապատրաստական աշխատանքների շրջանակներում գյուղացուն տրվում են պրակտիկ մեխանիզմներ գյուղատնտեսական ապրանքների որակը, քանակը և հիգենիկ պայմանները բարելավելու համար: Գյուղացին հասկանում է, որ վերջապես ազատվում է իր արտադրանքը վաճառելու և խոշոր արտադրողների հետ "մրցակցելու" դժվարին և անհուսալի գործից: Սկզբնական շրջանում ծրագրի լիարժեք մուտքը գյուղեր ամրապնդվում է նաև հատուկ գյուղական մրցույթների կազմակերպմամբ, որոնց միջոցով խրախուսվում են իրենց լավագույնս դրսևորած գյուղերն ու գյուղական համայնքները: Որպես խրախուսական մրցանակներ գյուղերին տրվում են գյուղատնտեսական տեխնիկա, որոշ արտոնություններ, հատուկ կարգավիճակներ և այլն: Չափազանց կարևոր է նաև, որ այս ծրագրի շրջանակներում գյուղացին ազատվի "Գյուղական բրենդի" միջոցով ստացվող եկամուտների համար հարկ վճարելու պարտավորությունից: Այս արտոնության չարաշահումներից խոսափելու համար ցանկալի է դնել որոշակի սահմանաչափ, որից ավել եկամուտ ունեցողները և գործատու հանդիսացողները պարտավոր են վճարել համպատասխան հարկեր: "Գյուղի բրենդ" նախագիծը կարող է իրագործվել ինչպես միանգամից, այնպես էլ փուլային սկզբունքով` աստիճանաբար ընդլայնելով սպառողին ներկայացվող արտադրանքի տեսականին:
|
