Հարցազրույց ԼՂՀ նախագահի մամուլի խոսնակ ԴԱՎԻԹ ԲԱԲԱՅԱՆԻ հետ
-Օրերս Արցախում էր Հայաստանի խորհրդարանական պատվիրակությունը՝ ԼՂՀ իշխանությունների հետ Բերձորում կատարվածը քննարկելու նպատակով: Որքանո՞վ էր այցը արդյունավետ, ու եթե նկատի ունենանք, որ խմբում ներառված էին իշխանական եւ ընդդիմադիր պատգամավորներ, ապա Արցախի իշխանությունների դիտարկումները նրանք նո՞ւյն կերպ ընկալեցին:
-Մենք ողջունում ենք խորհրդարանական ուժերի ներկայացուցիչների այցը Արցախ: Նման հանդիպումները, այցերը շատ կարեւոր են հայկական երկու պետությունների կապերի ամրապնդման, խորացման համար, հատկապես այնպիսի իրավիճակներում, երբ առավել քան հարկավոր է համատեղ որոշումների կայացումը:
Քննարկվել են մի շարք հարցեր. առանձնահատուկ ուշադրություն է դարձվել սահմաններում տիրող վիճակի վրա, ինչն ամենակարեւոր խնդիրն է, խոսվել է բանակաշինության մասին, նաեւ ԼՂ հակամարտության գործընթացից, եւ իհարկե, հունվարի 31-ին Բերձորում կատարվածի մասին: Այցը գնահատում եմ արդյունավետ:
Չկա գեթ մի ողջամիտ մարդ՝ լինի իշխանավոր թե ընդդիմադիր, որ «Հիմնադիր խորհրդարան» կոչվածի կատարածը ողջունի: Բոլորը հավասարաչափ դատապարտում են կատարվածը: Այլ բան է, որ եղել են բախումներ։ Պետք է դրանք լրջորեն հետաքննվեն, որ տեսնենք՝ իրականում ի՞նչ է տեղի ունեցել: Իսկ հետաքննության իրականացման հարցում ԼՂՀ իշխանությունները վճռականորեն են տրամադրված:
-Ձեր հարցազրույցներից մեկում ակնարկել եք՝ «տեսաձայնագրություններ չկան, որովհետեւ դա իրենց պետք չէ, իսկ իրենք ինչ ասես, որ չեն ասել»: Ուզում եք ասել, որ երթի մասնակիցնե՞րն են ոստիկաններին մղել սադրանքի՝ թերեւս նրանց հասցեին վիրավորական խոսքեր ուղղելով, իսկ հետո մոնտաժել տեսաերիզները:
-Այո, կարծում եմ սադրիչներին հաջողվել է Արցախի ոստիկանությանը հունից հանել՝ վատ խոսքեր ասելով, հայհոյելով, անգամ թուրք անվանելով: Բայց շրջանառվող տեսանյութերում ոչ մի ձայն, ոչ մի խոսք չի լսվում, ու դա վկայում է, որ նրանք ոչնչացրել են ձայնագրությունները:
Մինչ իրավապահները կտան կատարվածի իրավական գնահատականը, նշեմ մի կարեւոր հանգամանք: Արցախի ոստիկանները երբեւէ նման իրավիճակի չեն առնչվել, քանի որ Արցախում երբեք պառակտիչ, հակապետական ցույցեր չեն անցկացվել: Եվ դա փաստում է մեր ներքին բարձր կուլտուրայի, համախմբվածության մասին: Սա փաստում է նաեւ մեր ուժեղ ու ժողովրդավարական պետություն լինելու մասին, ուր նման խժդժություններ չեն լինում, քանի որ կա գիտակցումը՝ Արցախը գտնվում է պատերազմական իրավիճակում:
Մենք ունեցել ենք քաղաքականապես թեժ ընտրություններ՝ թե՛ նախագահական, թե՛ խորհրդարանական, սակայն երբեք նման զարգացումներ չեն եղել: Սա միտումնավոր ստեղծված իրավիճակ էր, ինչ-որ ուժերի ձեռքի գործը: Եվ ահա, Արցախի ոստիկանները բախվում են սադրիչների հրահրած՝ իրենց համար արտասովոր իրավիճակի:
Դա վկայում է Արցախի ոստիկանության անպատրաստ լինելու մասին, անգամ համապատասխան սարքավարումներ չեն ունեցել: Այսինքն՝ Արցախի կողմից որեւէ բան ծրագրված չի եղել: Կարծում եմ, որ եկողները նախօրոք ուսումնասիրել էին ներքին իրավիճակը ու համոզվել, որ ոստիկանությունը, պետական համակարգը, երբեւէ շփված չլինելով նման ներքին խռովարար երեւույթների հետ, նաեւ դրա դեմ պայքարելու փորձ չունեն:
-Մինչդեռ եկողները «զինված» էին ձայնագրիչներով, տեսախցիկներով, այսպես կոչված՝ «միջազգային լրագրողով»:
-Այո: Նրանց պատրաստված այցը հուշում է, որ եկել էին մշակված պրովոկացիոն սցենարով: Ո՞ւմ են ուզում հասցնել այդ տեսաերիզները, մեր թշնամիների՞ն: Այս դեպքը ցույց տվեց, որ կան թափթփուկներ, որոնց մասին Արցախում չգիտեին: Մենք տեսանք՝ իրենց քաղաքական գործիչներ ու մեկնաբաններ համարող անդաստիարակ մարդկանց:
Ես անգամ սարսափով եմ մտածում՝ ի՞նչ կարող է լինել, եթե հանկարծ նման թափթփուկները տիրապետեն իշխանական լծակների. դա մեր ազգի համար կլինի իսկական ողբերգություն: Ցավով պետք է ասեմ, որ հայերի անվան տակ կան ու գործում են ոչ էթնիկ հայեր, որոնք վատ ծառայություն են մատուցում մեր ազգին, ավելի վատ, քան մեր բացահայտ թշնամին: Մեր իմունային համակարգը պետք է ուժեղացնենք, որ կարողանանք նման վիրուսներից ազատվել, կարողանանք սադրանքներից ավելի ուժեղացած դուրս գալ:
-Ասվում է, թե Արցախի ոստիկանապետի խնդրանքին՝ չմտնել Արցախ, Ժիրայր Սեֆիլյանը նախ համաձայնել է, բայց հետո ասել, թե որոշումները միայնակ չի կայացնում: Սա չի՞ փաստում, որ նա ուղղորդվում է ինչ- որ ուժերի կողմից:
-Սեֆիլյանը նման բան ասել է, դա փաստ է: Ու նրա պատասխանը, այո, թույլ է տալիս ենթադրել, որ իր հետեւում ինչ-ինչ ուժեր կան, որոնց հետ նա նման հարցերի շուրջ խորհրդակցում է: Իսկ թե ովքե՞ր են, ի՞նչ ուժ են եւ ի՞նչ նպատակներ են հետապնդում՝ պետք է պարզեն համապատասխան մարմինները: Չնայած, անկեղծ ասած, ամեն ինչ այնքան պարզ է: Ի դեպ, եթե մինչ այդ դեպքը Արցախում կային մարդիկ, ովքեր հարգում էին Ժիրայր Սեֆիլյանին որպես կռված տղայի, ապա հիմա գերակշիռ մեծամասնությունը հիասթափված է նրանից:
-Տեր-Պետրոսյանի տարիներից շրջանառված ղարաբաղցի-հայաստանցի տարանջատող ցեցը Բերձորում կատարվածից հետո դարձյալ մեջտեղ է բերվում: Արցախում ի՞նչ տրամադրություններ են այս առումով:
-Արցախում ղարաբաղցի-հայաստանցի տարանջատումն ընդունում են որպես կեղտոտ քարոզչություն: Բարեբախտաբար կարողացել ենք ձերբազատվել այդ ամենից, չի էլ եղել նման բան, որքան էլ որոշ ուժեր անընդհատ աշխատել ու աշխատում են պառակտում սերմանել: Սա այլ բան չէ, քան հարված մեր պետականությանը: Թույլ չենք տա, որ նման պառակտումներ լինեն, ես հավատում եմ մեր ժողովրդին, նրա գիտակցությունն այնքան բարձր է, որ նման սադրանքների երբեք չի գնա:
-Հիմա էլ չեն դադարում խոսել, թե Բերձորի դեպքն ազդել է Արցախի վարկի վրա, թե միջազգային կառույցներն իրենց խոսքն ասելու են. տպավորությունն այնպիսին է՝ կարծես դրսին ուղղորդում են բացասական կարծիք հայտնել։
-Արցախը միշտ բարձր գնահատականի է արժանանում տարբեր միջազգային կառույցների կողմից: Բայց հիշում եմ՝ որոշ անհասկանալի ուժեր նման շահարկումներ արեցին 2012-ի ընտրությունների ժամանակ, դրա հետեւանքով ժողովրդավարության աստիճանով մեր գնահատականը իջավ, չնայած հետո նորից բարձրացավ: Հիմա դարձյալ այդ կասկածելի ուժերը, որոնք հրահրեցին այս սադրանքը, պետք է աշխատեն, որ միջազգային կառույցները մի վատ հայտարարությամբ հանդես գան:
Գիտեք, այս օրերին մի բան էի մտածում՝ ի՞նչ կլիներ, եթե Ադրբեջանում Սեֆիլյանի նման մեկը իր խմբով հայտնվեր ու փորձեր նման քայլ կատարել: Ադրբեջանի իշխանությունը ուղղակի կկորցներ այդ խմբին: Ու ես հպարտ եմ, որ մեր երկիրը այդպիսին չէ, որ մեր համակարգը ժողովրդավարական է:
Ի վերջո, մենք պատերազմեցինք օտարի լծի դեմ, որպեսզի ժողովրդավարական պետություն կառուցենք: Ու հիմա, եթե ինչ-որ սադրիչներ փորձում են իրավիճակից օգտվել՝ զզվելի է: Ո՞ւմ ջրաղացին եք ջուր լցնում:
vk.com/antimaidan_armenia
