Առողջ ապրելակերպի փիլիսոփայություն.
«Առաջինը ոգին, հետո` հնարքը»
Կարատեն` արևելյան այս մարտարվեստը, մեծ տարածում ունի նաև մեր երկրում: 15 հազար հայորդի ողջ երկրով մեկ առողջ ապրելակերպի այս ճանապարհն են ընտրել։
2014 թվականից այս սպորտաձեւով զբաղվում են նաեւ Ներքին Դվին գյուղի երեխաները, որոնց մարզում է Արարատի մարզի և Հայաստանի բազմակի չեմպիոն Արարատ Հարությունյանը։
Նախընթաց տարիներին երեխաները շատ մրցույթների են մասնակցել եւ ունեն բազմաթիվ պատվոգրեր, մեդալներ եւ գավաթներ։ Ապրիլի 15-ին նույնպես Ներքին Դվինի խմբակից երկու հոգի մասնակցեցին կարևոր մրցության: Իսկ ապրիլի 30-ին բոլոր սաները կմասնակցեն Մխչյան գյուղում կայանալիք մրցաշարին, որտեղ ներգրավված է 8 թիմ` 100 մասնակցով։ Այդ մրցույթում են որոշվելու Հայաստանի առաջնության մասնակիցները։
Կարատեի առաջացման պատմությունը շատ հետաքրքիր է: Այն ստեղծել է Գիչին Ֆունակոշին։
Նա զբոսնում էր Օկինավա թերակղզում, երբ նկատում է, թե ինչպես են սոճու ծառերը շարժվում քամուց։ Ֆունակոշին այդ շարժումները նմանեցնում է հարվածների եւ պաշտպանության. կրկնօրինակելով այդ շարժումները` ստեղծում է այն հանրահայտ մարտարվեստը, որ կոչվում է կարատե։
Ըստ նրա՝ կարատեն մարդուն մաքրում է եսասիրությունից եւ չար մտքերից, բացի այդ, կարատե պարապողը չպետք է հեշտությամբ կռվի մեջ ներքաշվի։
Եթե մարդն ուզում է հաջողությունների հասնել այս մարտարվեստում, պետք է տքնաջան աշխատի և շատ սիրի կարատեն ։
Կարատեն ոչ միայն սպորտաձև է, այլև ապրելակերպ։ Մարզումներն սկսվում են կարգապահության հորդորով՝ հարգանք սերմանելով թե' ուսուցչի, թե' ծնողների հանդեպ։
Կարատեն ունի իր ուրույն վարքականոնը, որը պահպանելը պարտադիր է յուրաքանչյուր մարզիկի համար։
Նշենք այդ պատվիրաններից մի քանիսը՝
.կարատեն սկսվում և ավարտվում է խոնարհումով։
•կարատեում չկա առաջին հարձակում։
•կարատեն օգնում է արդարության հաղթանակին։
•նախ կառավարիր ինքդ քեզ, հետո՝ ուրիշներին։
•առաջինը ոգին, հետո՝ հնարքը։
Եվ նման շատ այլ կանոններ, որոնք օգնում են մարզիկներին լինել առաքինի և ապրել ճիշտ ։
Մարիամ ՍԱՐԳՍՅԱՆ
«Հայորդի» լրագրողական ակումբ
«Հայորդի» երիտասարդական, հոգևոր, մշակութային ամսաթերթ Թիվ 4, ապրիլ 2017թ.