2015թ. ապրիլի 28-ին Զոլաքար գյուղի թիվ 1 միջնակարգ դպրոցում տեղի ունեցավ միջոցառում, որի խորագիրն էր «Մեր տան Աստվածն է մայրս»: Միջոցառումը ներկայացնում էին 6-րդ դասարանի աշակերտները, իսկ կազմակերպողը դասղեկ Ս. Հարոյանն էր: Միջոցառումը ներառում էր հայ գրականության կառկառուն դեմքերից մեկի` Հ.Շիրազի «Հուշարձան մայրիկիս» ժողովածուն: Աշակերտները միջոցառման ժամանակ ներկայացրեցին ասույթներ, բանաստեղծություններ, երգեր, որոնց միջոցով մեկնաբանեցին, թե ինչպես է Շիրազը վեհացրել մայրական թեման: Նա մորը գնահատել է ինչպես Աստծո և պատգամել «Թե մայրը կա, էլ ի՞նչ Աստված»: Աշակերտներն իրենց խոսքերում նշեցին, որ մայրն օջախի սյունն է, առաստաղը, տերն ու ծառան, ապացուցեցին, որ մարդկային ամենամեծ հրաշալիքը մայրն է:
Աշակերտները միջոցառումն ավարտեցին հետևյալ խորհրդանշական մեկնաբանությամբ` մայրասիրությունը միահյուսվում է հայրենասիրությանը, կազմելով սուրբ երրորդություն` մայր-մայր հայրենիք- մայրենի լեզու:
