Արցախյան ազատամարտի տարիներին հրազդանցի շատ ազատամարտիկներ զոհվեցին, որոնց աճյուններն այսօր ամփոփված են Հրազդանի Կոճոռ թաղամասի գերեզմանատանը:Սակայն մեր հերոսների գերեզմանատունը ընդհանուրից առանձնացնելու և բարեկարգելու նպատակով Հրազդանի բնակիչ Սահակ Կարապետյանը, ում եղբայրը` Վազրիկ Կարապետյանը, ևս զոհվել է Արցախյան մարտերի ժամանակ, իր միջոցներով նախաձեռնել է գերեզմանատունը պանթեոնի վերածելու գործը:Ծրագիրը շուրջ 20 տարի ընդգրկված է եղել Հրազդանի քաղաքապետարանի աշխատանքային պլանում, սակայն նյութական միջոցների սղության պատճառով չի իրագործվել:Սահակ Կարապետյանը պատմեց, որ քաղաքապետարանը, այնուամենայնիվ, աջակցություն ցուցաբերել է`համապատասխան տեխնիկայի տրամադրմամբ, քաղաքապետարանի ճարտարապետն էլ կատարել է տարածքի չափագրումը:Աշխատանքների արդյունքում պարսպապատվել է պանթեոնի 80 տոկոսը:Աշխատանքները նախատեսված է ավարտել գարնանը: Սահակ Կարապետյանն ուրախ է, որ կարողացել է իրականացնել մտադրությունը. <Առաջիկայում նախատեսում եմ նաև եկեղեցի կառուցել այս տարածքում, որպեսզի զոհված ազատամարտիկների հարազատները մոմ վառեն իրենց զավակների հոգիների համար>, - ամփոփեց բարերարը: