Թեոդորոս Ա Ռշտունեցի
(930–941)
Հայոց կաթողիկոս է դարձել 930 թ.-ից` հաջորդելով Ստեփանոս Բ Ռշտունուն:
Ծննդյան թիվն անհայտ է, սակայն հայտնի է, որ ծնվել է Ռշտունիքում: Մահացել է 941 թ.-ին Աղթամարում` ամփոփվելով տեղի Ս. Խաչ Կաթողիկեի մոտ գտնվող Ս. Աստվածածին ժամատան բակում:
Մաղաքիա Օրմանյանի կարծիքով նա Ռշտունի է անվանվել ոչ այն պատճառով, որ եղել է Ռշտունիների նախարարական ընտանիքից, այլ, որ ծնունդով ռշտունեցի էր, ինչպես նաև Ռշտունիքի եպիսկոպոս: Կաթողիկոսական գահ է բարձրացել Վասպուրականի թագավոր Գագիկ I–ի հովանավորությամբ: Գահակալել է քաղաքական խաղաղ պայմաններում և մահացել Աղթամարում:
Կաթողիկոսական գահին Թեոդորոս Ա Ռշտունուն հաջորդել է Եղիշե Ա Ռշտունին:
Աղբյուրը` Ամենայն Հայոց Կաթողիկոսներ հանրագիտարան, Ս. Էջմիածին, 2008