ՀՀ տրանսպորտի և կապի նախարար Գագիկ Բեգլարյանն ապրիլի 8-ին ընդունեց Ռումինիայի էկոնոմիկայի նախարար Վարուժան Ոսկանյանին, Հայաստանում Ռումինիայի արտակարգ և լիազոր դեսպան Կրինա Ռոդիքա Պրունարիուին, Ռումինիայի էկոնոմիկայի նախարարության խորհրդական Դան Սիկոլեին։
Հանդիպման ընթացքում կողմերը քննարկեցին երկկողմ հարաբերություններին առնչվող մի շարք հարցեր։
Նշվեց, որ Հայաստանի և Ռումինիայի միջև համագործակցության զարգացման համար ստեղծված է լիարժեք իրավապայմանագրային դաշտ, երկկողմ համաձայնագրեր են ստորագրված հնարավոր համագործակցության գրեթե բոլոր բնագավառներում. այս մասին տեղեկանում ենք ՀՀ տրանսպորտի և կապի նախարարության պաշտոնական կայքէջից:
Հանդիպման ընթացքում պայմանավորվածություն ձեռք բերվեց քայլեր ձեռնարկել երկու երկրների միջև առևտրատնտեսական հարաբերություններն է՛լ ավելի խորացնելու և ապրանքաշրջանառության ծավալները մեծացնելու ուղղությամբ։
Նախարարների միջև ձեռք բերվեց համաձայնություն՝ առևտրատնտեսական և գիտատեխնիկական համագործակցության հարցերով հայ-ռումինական միջկառավարական համագործակցության հաջորդ՝ 4-րդ նիստը գումարել Երևանում, 2013 թ. հունիսին։