«Մերժի՛ր Սերժի Գարեգինին» նախաձեռնությունը կոչով դիմում է ձեզ, որպեսզի մայիսի 29-հունիսի 1-ը Մայր Աթոռ Սուրբ Էջմիածնում կայանալիք Գերագույն հոգևոր խորհրդի ընթացքում օրակարգի նյութ դարձնեք նաև աշխարհասփյուռ հայությանը հուզող և անհանգստացնող հորդոր-խնդրանքը, որը վերաբերում է Գարեգին Բ կաթողիկոսի հրաժարականին:
Դատելով վերջին մի քանի օրերի ընթացքում մեր ֆեյսբուքյան էջի հարցման արդյունքներից և այդ թեմայով հրապարակումների արձագանքներից՝ ակնհայտ է դառնում, որ հայ ժողովրդի մի հսկա մեծամասնություն դեմ է արտահայտվում Գարեգին Բ-ին և չի ճանաչում նրան՝ որպես ամենայն հայոց կաթողիկոս:
Մենք մեր նախորդ հրապարակումներից մեկում այս հրաժարականի պահանջը հիմնավորել ենք ինը կետերով, որոնք այստեղ կրկնելու կարիքը չենք տեսնում: Պողոս առաքյալն ասում է. «Երեցի մասին ամբաստանություն մի՛ ընդունիր, բացի այն դեպքից, երբ դա երկու կամ երեք վկաներով լինի» (Ա. Տիմ 5: 19):
Ուրեմն, եթե մեր սուրբ առաքյալն ասում է, որ 2-3 հոգին բավարար է ամբաստանելու և հանդիմանելու համար, ապա որքա՛ն առավել միլիոնավոր հայորդիների արդար պահանջը՝ իրենց ընդվզումն արտահայտելու առաջիկա Գերագույն հոգևոր խորհրդի ընդլայնված նիստերի ժամանակ:
Մենք ակնկալում ենք, որ Հայ Առաքելական եկեղեցու եպիսկոպոսաց դասը այնքան խոհեմություն կդրսևորի, որպեսզի այս չափազանց կարևոր հարցը եկեղեցու ներսում բարձրաձայնվի և դրական լուծում ստանա։
Հակառակ դեպքում ստիպված կլինենք կոչով դիմելու վճռական քայլերի՝ մեր ասելիքը տեղ հասցնելու և վերջնական նպատակին հասնելու համար։
«Մերժի՛ր Սերժի Գարեգինին» նախաձեռնության անդամներ
