«Արտ ֆեստ 2017» միջազգային փառատոնի հաջորդ կանգառը նկարիչների միությունն է:
Երգարվեստի լսումներին ու կինոդիտումներին, կազմակերպված վարպետության դասերին եկել է հաջորդելու կերպարվեստի և դեկորատիվ-կիրառական արվեստի ցուցադրությունը:
Ցուցահանդեսի բացմանը ներկա էին Ժյուրիի անդամներ Հայաստանի նկարիչների միության նախագահ Կարեն Աղամյանը, ՀՀ վաստակավոր նկարիչ Դավիթ Մինասյանը, ՀՀ արվեստի վաստակավոր գործիչ, լուսանկարիչ Սամվել Սևադան, ՀՀ վաստակավոր նկարիչ Աշոտ Համբարձումյանը, , հայտնի այլ արվեստագետներ և արտասահմանյան հյուրեր:
«Արտ Ֆեստ» միջազգային փառատոնի նախագահ Էրիկ Բարսեղյանը նշում է, որ Արտ Ֆեստ փառատոնը բացառիկ է, քանի որ ընդգրկում է արվեստի մի քանի ճյուղերը միաժամանակ. « «Արտ Ֆեստ» միջազգային փառատոնը տարեցտարի գրանցում է դինամիկ աճ՝ թե՛ աշխարհագրական ընդգրկմամբ, թե՛ մասնակիցների թվի աճով, և սա է հենց հանդիսանում փառատոնի ապրելու գլխավոր շարժառիթը»:
ՀՀ մշակույթի նախարարի խորհրդական Վահան Եղիազարյանը նույնպես ներկա էր ցուցահանդեսի բացմանը: Վերջինս նշում է, որ ցուցահանդեսում ներկայացված մշակութային գործերը այլ տարիների համեմատ ավելի արժեքավոր են, և դա հսկայական առաջխաղացում է:
Երևանի քաղաքապետի տեղակալ Արամ Սուքիասյանն էլ նշեց, որ Երևան քաղաքում ցանկացած մշակութային նախանձեռնություն մայրաքաղաքն ավելի է երիտասարդացնում: Բարի ընթացք մաղթեց «Արտ ֆեստին»` իր յուրաքանչյուր մասնակցով:
«Նմանօրինակ միջոցառումները մեծ դեր են խաղում երիտասարդ արվեստագետների հանրայնացման ու միջազգայնացման գործում», - վստահեցնում է պարոն Սուքիասյանը:
Փառատոնին ներկայացված աշխատանքները շուրջ 250 հայտերից ընտրված լավագույններն են և առաջիկա երեք օրերին կցուցադրվեն Հայաստանի նկարիչների միությունում: Նկարիչների միությունը հեղեղած մշակութային գործերը հիմնականում ընգրկում են գեղանկարչության, լուսանկարչության, գրաֆիկայի, բատիկի, քանդակագործության, գոբելենի, խեղեգործություն և տիկնիկագործություն ոլորտները:
Կերպարվեստի մասնագիտական հանձնախմբի նախագահ, լուսանկարիչ, բանաստեղծ Սամվել Սևադան նշեց, որ արվեստի բոլոր ոճերը համատեղելը հրաշալի ու բարդ աշխատանք է: Նա մեծ առաջընթաց է նկատում կերպարվեստի, գեղանկարչության ոլորտում և հույս ունի, որ դեռ մեծ քայլերով առաջ կգնան:
Հանձնախմբից, հետաքրքրված անձանցից բացի և հյուրերից բացի` ներկա էին նաև մասնակիցները` աշխատանքների հեղինակները:
«Կարծում եմ ցուցահանդեսների մասնակցելով ու քեզ հեռվից դիտելով շատ ավելի լավ ես հասկանում արածդ գործի արժեքը: Արվեստանոցը կարծես արհեստական սահմաններ ստեղծի ու չթողնի համեմատես այլ գործերի հետ: Նմանօրինակ փառատոնները շատ լավ առիթ են ինքնադրսևորվելու ու ինքդ քեզ քննադատի աչքերով նայելու համար: Իսկ «Արտ Ֆեստ» փառատոնը լավ հնարավորություն է՝ ճանաչելու ու ճանաչվելու: Ճանաչելու նոր մտքեր, նոր դեմքեր ու նոր գույներ», - ասում է մասնակիցներից մեկը` Արման Օհանյանը:
Իսկ Շուշանիկ Գևորգյանը հավելում է, որ «Արտ Ֆեստ» -ը հնարավորություն է տալիս նկարչին՝ աճելու, ցուցադրելու սեփական արվեստը:
Անի Յավրենց