Տասն օր շարունակ ամառային օրերն էլ ավելի գունավոր կդարձնի հայաստանյան ամենաերիտասարդական փառատոնը՝ «Արտֆեստ» -ը: 7 երկրի 500 երիտասարդ է եկել՝ «Մեկ տանիքի ներքո» մասնակցելու «Արտֆեստ» միջազգային 5-րդ փառատոնին:
Փառատոնի բացումը հունիսի 8-ին՝ ժամը 18.00-ին, կայացավ Երեւանի թատրոնի եւ կինոյի պետական ինստիտուտի ուսանողական թատրոնում՝ «Վեստսայդյան պատմություն» պարային ներկայացմամբ:
Փառատոնն այս տարի ընդգրկում է արվեստի ավելի քան 10 ճյուղ՝ թատերարվեստ, կինոարվեստ, գեղանկարչություն, քանդակագործություն, գրաֆիկա, լուսանկարչություն եւ այլն։
Առաջին անգամ ընդգրկվել է նաեւ «Գրականություն, դրամատուրգիա եւ կինոսցենար» անվանակարգը, որն այս տարի նվիրվում է մեր անվանի արձակագիր, սցենարիստ Ռուբեն Հովսեփյանի հիշատակին: Այս անվանակարգում հաղթողների համար Ռուբեն Հովսեփյանի ընտանիքը սահմանել է 100 հազարական դրամ պարգեւ:
«Դրամական մրցանակ սահմանելու գաղափարը մայրիկինս էր: Թեպետ այն շատ մեծ չէ, բայց կարծում ենք, որ երիտասարդ մարդու համար դա ոգեւորիչ կլինի: Ինչ-որ առումով մեր ընտանիքը փորձում է աջակցել այս ոլորտում նոր ճանապարհ հարթող երիտասարդներին», - ասել է Ռուբեն Հովսեփյանի դուստրը՝ Մոնի Հովսեփյանը:
Փառատոնի նախագահ Էրիկ Բաղդասարյանը շեշտեց, որ փառատոնն անցկացվելու է «Մեկ տանիքի ներքո» խորագրով: Նա մեծ ուրախությամբ ընդգծեց, որ 5 տարի առաջ փառատոնին մասնակցում էին 130 երիտասարդ արվեստագետներ, իսկ այս տարի ավելի քան 500 հայտ էին ստացել, որոնցից ընտրվել են լավագույնները:
10-օրյա փառատոնի շրջանակներում նախատեսված են երիտասարդական թատերական ներկայացումներ, կինոդիտումներ, նորաձեւության ցուցադրություններ, ցուցահանդեսներ, համերգներ, գրական ընթերցումներ, վարպետության դասեր:
Փառատոնի ժյուրիի կազմում եւ մասնակիցների թվում կան հյուրեր Շվեդիայից, Ռուսաստանից, Ուկրաինայից, Տանզանիայից, Չեխիայից, Վրաստանից եւ Ղազախստանից: