Սեպտեմբերի 28-ին Արդարադատության ակադեմիա էին այցելել Հարավային Կովկասում ՄԱԿ փախստականների հարցերով գերագույն հանձնակատարի (ՓԳՀ) տարածաշրջանային գրասենյակի ներկայացուցչի տեղակալ Հայ Շելոն և հայաստանյան գրասենյակի իրավաբանական բաժնի ղեկավար Քեյթ Պոչապսկին:
Ողջունելով հյուրերին՝ Արդարադատության ակադեմիայի ռեկտոր Սերգեյ Առաքելյանը դրական գնահատեց Ակադեմիայի և ՄԱԿ ՓԳՀ հայաստանյան գրասենյակի միջև ստորագրված փոխըմբռնման հուշագրի հիմքով առկա համագործակցությունը: Ռեկտորը հյուրերին տեղեկացրեց, որ բոլորովին վերջերս մշակված «Փախստականների իրավունք» հեռաուսուցման դասընթացի շրջանակում արդեն իսկ 10 դատավոր վերապատրաստվում է:
Խոսելով տարածաշրջանում իրենց գրասենյակի կողմից իրականացվող ծրագրերի մասին՝ Հայ Շելոն բարձր գնահատեց առկա ձեռքբերումները և առաջարկեց համագործակցության նոր ձևաչափեր: Այդ առումով ակադեմիայի ռեկտորը մի շարք առաջարկներ ներկայացրեց, մասնավորապես՝ կրթական նոր նյութերի մշակման, ուղեցույցների հրատարակման վերաբերյալ, որոնք ուղղված կլինեն փախստականների իրավունքի մասին ակադեմիայի ունկնդիրների վերապատրաստման արդյունավետության բարձրացմանը:
Հյուրերը դրական գնահատեցին ակադեմիայի նախաձեռնողականությունն ու համագործակցությունը խորացնելու պատրաստակամություն հայտնեցին:
