Արթուր Աբրահամ հարցազրույց
Առաջիկա մենամարտում չհաղթելու դեպքում Արթուր Աբրահամը կարող է մտածել կարիերան ավարտելու մասին։ Այդ մտորումները բարձրաձայնեց ինքը՝ պրոֆեսիոնալ բռնցքամարտի սուպերմիջին քաշային կարգում աշխարհի նախկին չեմպիոնը այսօր կայացած մամուլի ասուլիսի ժամանակ։ Աբրահամը նախ խոսեց նախորդ մենամարտի մասին, որում 33-ամյա հայ մարզիկը հաղթել էր իտալացի Ջովանի Դե Կարոլիսին։ «Չկան այնպիսի մենամարտեր, որոնք թերություններ չունենան: Մրցակիցը ամեն ինչ անում էր նոկաուտից խուսափելու համար։ Սակայն այդ հաղթանակն ինձ համար մեծ կարևորություն չուներ. ինձ համար ամենակարևորը հաջորդ մենամարտն է աշխարհի չեմպիոնի կոչման համար, որը տեղի կունենա փետրվարի մեկին: Սա իմ երրորդ մենամարտն է լինելու Ռոբերտ Շտիգլիցի դեմ։ Կկռվենք Գերմանիայում, սակայն քաղաքը դեռ հայտնի չէ: Շտիգլիցի հետ մենամարտելու միայն մեկ պլան կա՝ մրցակցիս «սատկացնել»: Կյանքիս ամենակարևոր մենամարտն է լինելու և կարևոր անելիքն այսօրվա դրությամբ: Սա իմ կյանքի հարցն է, WBO վարկածով գոտու մասին յուրաքանչյուր բռնցքամարտիկ երազում է, և ես ամեն ինչ անելու եմ կրկին հաղթելու և աշխարհի չեմպիոնի կոչման համար, որպեսզի կարողանամ գիշերները հանգիստ քնել։ Եթե չհաղթեմ, գուցե սկսեմ մտածել ռինգից հեռանալու մասին», -նշեց Աբրահամը։ Անդրադառնալով ներկա մարզավիճակին և ապագայի ծրագրերին՝ բռնցքամարտիկն ասաց. «Հայաստանում հանգստանալու եմ: Մարզավիճակս դեռ կատարյալ չէ: Շաբաթական մեկ-երկու անգամ վազում եմ: Մեկ շաբաթից մեկնելուց հետո կսկսեմ մարզվել: Հայաստան եմ եկել Մասիսում մեր կառուցած եկեղեցու բակում ծառատունկին մասնակցելու։ Մարզադպրոց կառուցելու մասին դեռ չեմ մտածում։ Կարիերաս կավարտեմ երևի 2 տարուց՝ 35 տարեկանում: Ճիշտ ժամանակին հեռանալը շատ կարևոր է»: Աբրահամը խոսեց նաև Վիկ Դարչինյանի՝ ֆիլիպինցի Նոնիտո Դոների հետ ռևանշ մենամարտում կրած վերջին պարտության, ինչպես նաև Հենրիխ Մխիթարյանի հետ հարաբերությունների մասին։ «Ցավում եմ, որ մենամարտն այդպես ավարտվեց: Սպորտում ամեն ինչ հնարավոր է: Վիկը իր մարզչի հետո թող որոշի սխալները։ Ինչ վերաբերում է Հենրիխ Մխիթարյանին, ապա նրա հետ կապ ունեմ, հեռախոսով հաճախ ենք զրուցում, բայց իրարից 700-800 կիլոմետր հեռու ենք։ «Բորուսսիան» իմ սիրելի ակումբն է, ժամանակ ունենալու դեպքում հետևում եմ հանդիպումներին։»: Մարզիկը խոսեց նաև հայաստանցի բռնցքամարտիկների, քաղաքականության և պատանի հասակում իրեն ոգենշնչողների մասին։ «Մեր բռնցքամարտիկները մի քանի անգամ ապացուցել են, որ բարձր մակարդակի վրա են: Ճիշտ է, ռուսները, կուբացներն ավելի ուժեղ են, բայց նրանք թվով էլ են շատ։ Քաղաքականությամբ չեմ զբաղվում, պարզապես հետևում եմ: Բռցքամարտով սկսել եմ զբաղվել Մայք Թայսոնից ոգեքամշնչվելով: Գիտեմ, որ գիրք է հրատարակել, բայց դեռ չեմ ծանոթացել: Թայսոնին անյնքան էի սիրում, որ անգամ իմ շանն ու նապաստակին նրա անունով եմ կոչել», -ամփոփեց Արթուր Աբրահամը։ |