Հայոց բանակի տարեդարձին նվիրված հոբելյանական միջոցառումների գեղեցիկ շղթան Նոր Նորք վարչական շրջանում համալրվեց ևս մեկով: Հ.105 մանկապարտեզում բանակի 25-ամյակի առթիվ կազմակերպվել էր ուշագրավ տոնահանդես, որտեղ կրթօջախի սաները տպավորիչ բեմադրությամբ ներկայացրել են հայոց զինված ուժերի առօրյան, հերոսական ուղին և մարտական անսասան ոգին: Միջոցառմանը մասնակցել են Արցախի պատերազմի հերոս, գեներալ Արկադի Տեր- Թադևոսյանը՝ Կոմանդոսը, Նոր Նորք վարչական շրջանի ղեկավարի տեղակալ Արմեն Ալավերդյանը, ՀՀ ԵԿՄ վարչության փոխնախագահ Ղուկաս Ուլիխանյանը, ՀՀ ԵԿՄ Նոր Նորքի տարածքային բաժանմունքի ղեկավար Արամ Պողոսյանը, բարձրաստիճան զինվորականներ, ազատամարտիկներ, կրթության ոլորտի ներկայացուցիչներ և այլ հյուրեր: Դահլիճում ներկա փոքրիկների անկեղծ ելույթներով հայոց հզոր բանակի ուժն ու զորությունը գաղափարական գեղեցիկ լուծումներով թևածել է դահլիճում` ամփոփվելով համայն աշխարհին ուղղված խաղաղության կոչով: Իրենց անկեղծ տպավորություններով կիսվել և տոնի նշանակությունն արժևորել են ներկա հյուրերը` երեխաներին մաղթելով գունեղ ու հեքիաթային մանկություն: Նման միջոցառումների դերն ու խորհուրդը բարձր է գնահատել նաև Երկրապահ կամավորականների միության փոխնախագահ Ղուկաս Ուլիխանյանը: Նոր սերնդին ռազմահայրենասիրական արժեքներով կրթելու և դաստիարակելու գործում ունեցած ավանդի համար միության փոխնախագահը ԵԿՄ պատվոգրով է պարգևատրել հ.105 մանկապարտեզին: Հայոց բանակը մեր ազգային հպարտությունն է, մեր առաջընթացի գրավականն ու հենասյունը: Շնորհավոր տոնդ Հայաստան, փառք քեզ հայրենիքի զինվոր:
Նկարները՝
այստեղ
