Ֆրանսիական հեղափոխության նշանավոր գործիչ Կոլո դ՝Էրբուան ամենադաժան յակոբինականներից մեկն է եղել: Լիոն քաղաքում հակահեղափոխականների մահապատիժն արագացնելու և ժամանակ շահելու համար նա առաջարկել է գիլյոտինով գլխատումը փոխարինել խոշոր կոտորակով գնդակահարությամբ: Հետագայում նա խոշոր կոտորակով գնդակահարությանը փորձել է գեղեցիկ զգեստ հագցնել՝ անվանելով այն «հումանիզմի դրսևորում»: Բայց դա արդյունք չի տվել, որովհետև ֆրանսիացիների հիշողության ու Ֆրանսիայի պատմության մեջ նրա անունը «Ֆրանսիայի դահիճ» խարանով է զուգորդվել:
Թերմիդորյան հեղաշրջումից հետո Կոլո դ՝Էրբուային աքսորել են Ֆրանսիական Գվիանա, որտեղ նա փորձել է սպիտակամորթների դեմ սևամորթների ապստամբություն կազմակերպել, բայց դեղնախտից մեռել է:
Ժամանակակիցներն ասում են, թե այդ դաժանությունը, որ արգասիք է վիրավորվածության, նրա սրտում բնադրել է Լիոնում, որի թատրոնում նա մինչև հեղափոխությունը որպես դերասան բեմ է բարձրացել, բայց քանի որ անտաղանդ դերասան է եղել, միշտ հանդիսատեսի սուլոցին է արժանացել: