Թե ուզում ես փորդ պինդ լցնես` առնետ դարձի'ր, թունավոր նետ դարձի'ր, ջարդի'ր, փշրի'ր, ոտերի տակ տու'ր` տրորի'ր ու հետ մի դարձի'ր, խենթ դարձի'ր, փնթի դարձի'ր, սուտ ու փուչ դարձի'ր, թուք ու մուր դարձի'ր, թուրք դարձի'ր... քթի մազ դարձի'ր, մորեղ դարձի'ր, մողես դարձի'ր... Թիկունքից խփող դարձի'ր, ոտքերի տակ փորող դարձի'ր, նեղ ընկած ժամ` ձեռը պաչի'ր, լեն ընկած տեղն` գլխին փամփի'ր: Հաց տվողի` հացը խլի'ր, ջուր խմած աղբյուրը` քար գցի'ր, գառան մորթի հագած` գայլ դարձի'ր` ոչխարի հոտը մտի'ր, կե'ր, խմի'ր լկտիացի'ր` ուրիշի խելքով ու շնորհքով մարդ դարձի'ր, ամեն ինչ քո կողմը տաշի'ր` ուրագի պես, ամեն ինչ քեզ քաշի'ր, Տաշիր մտի'ր` քաշդ չափի'ր, տաշի - տուշի պարդ ածի'ր ու տաշած բախտդ` մաշի'ր...
