Իրատես De facto, 27.03.2012
Մարտի 15-ին ավարտվել է միասնական և կենտրոնացված քննությունների հայտագրման գործընթացը։ Այժմ ընթանում է տվյալների բազավորման և ճշգրտման փուլը։ Ինչպես մեզ հետ զրույցում նշեց գնահատման և թեստավորման կենտրոնի մշակումների և կազմակերպական բաժնի պետ ԿԱՐՈ ՆԱՍԻԲՅԱՆԸ, ճշգրտման փուլում դիմորդն իրավունք ունի հրաժարվելու քննությունից, փոփոխելու այն, նոր դիմում-հայտ գրելու: Փոփոխությունները կարող են կատարվել մինչև ապրիլի 10-ը։ Կարո Նասիբյանը նկատում է, որ որոշ դպրոցների տնօրեններ (հատկապես մարզերի) անփույթ վերաբերմունք են ցուցաբերում շրջանավարտների դիմում-հայտերի նկատմամբ։ «Հինգ-վեց տարի է՝ կազմակերպվում են միասնական քննություններ, 6-րդ տարին է` դպրոցներին տրվում են դիմում-հայտերը, որտեղ շրջանավարտն ընդամենը պետք է լրացնի իր անուն-ազգանունը, դպրոցի համարը, անձնագրային տվյալները, հեռախոսահամարը և ինչ առարկա է ընտրել քննություն հանձնելու համար։ Ես արդեն ամաչում եմ գնալ դպրոց կամ հավաքել դպրոցների տնօրեններին և հերթական անգամ բացատրել, թե ինչպես պետք է լրացնել այդ հայտաձևը։ Խայտառակություն էին այս տարվա դիմում-հայտերը։ Դպրոցների տնօրենների կեսը փաստաթուղթ է ուղարկել գնահատման և թեստավորման կենտրոն խայտառակ վիճակում։ Նույնիսկ չեն ստորագրել, կնիք չեն դրել փաստաթղթի վրա։ Եթե դպրոցի տնօրենն այդպիսին է, նրա կրթած երեխան ի՞նչ պետք է լինի»,- ասում է Կարո Նասիբյանը։ Ի դեպ, տեղեկացնենք նաև, որ գնահատման և թեստավորման կենտրոնն ամեն տարի դպրոցների տնօրենների համար անցկացնում է հանդիպումներ՝ բացատրելով դիմում-հայտերի լրացման ձևը։
Լիլիթ ԳՐԻԳՈՐՅԱՆ
http://www.idefacto.am/page.php?section=news_more&id=6434
