1131 թվականի հոկտեմբերի 13-ին Ֆրանսիայի տասնհինգամյա թագաժառանգ Ֆիլիպը՝ Լյուդովիկոս 6-րդ Հաստլիկի որդին, ձիով անցնելիս է եղել Փարիզի մերձակա մի բլրակի վրայով (այժմ այդ վայրում Փարիզի 4-րդ շրջանի վարչության շենքն է): Այն պահին, երբ նա վարգել է իր մի քանի ուղեկիցների հետ, հանկարծ մի խոզ է վազելով նետվել նրա ձիու ոտների տակ: Վախեցած ձին ծառացել է: Հեծյալն ընկել է գետնին՝ գլուխը խփելով քարին, իսկ ձին տապալվել է նրա վրա: Նույն օրվա երեկոյան արքայազնը մահացել է:
Մի քանի օր անց հրամանագիր է հրապարակվել, որով արգելվել է խոզերին Փարիզի փողոցներում արձակել: Թույլատրվել է միայն Սուրբ Անտուանի վանքի վանականներին՝ պայմանով, որ նրանք խոզերի պարանոցին զանգակ կախած լինեն:
