Սիրելի երիտասարդներ
Սիրո բարեխոս Սուրբ Սարգիս զորավարի, իր որդի Մարտիրոսի և 14 քաջ մարտիկների հիշատակության օրն այս տարի Հայաստանյայց Առաքելական Սուրբ Եկեղեցին նշում է փետրվարի 8-ին։
Տարիներ առաջ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի տնօրինությամբ Ս. Սարգիս զորավարի տոնը հռչակվել է Երիտասարդների օրհնության օր։
Սուրբ Սարգսի տոնը հայերը նշում են ոչ միայն եկեղեցական ծեսով և աղոթքներով, այլև ժողովրդական ավանդույթներով։
Սուրբ Սարգսի տոնին նախորդող գիշերը երիտասարդ աղջիկներն աղի բլիթ են ուտում և ակնկալում՝ երազում տեսնել իրենց ապագա փեսացուին, ում տված ջուրը կհագեցնի իրենց ծարավը։ Ընդունված է եղել նաև տան տանիքին կամ պատշգամբում ամանով փոխինձ դնել և սպասել, որ երբ Ս. Սարգիսը անցնի, այնտեղ կթողնի իր ձիու պայտի հետքերը։ Իսկ այդպիսի մարդկանց, ըստ ավանդության, սպասվում է մեծ հաջողություն։
Շնորհավոր Սուրբ Սարգիս զորավարի տոնը: Երիտասարդներին մաղթում եմ անսահման սեր, գորով, կամք և ուժ:
Մամիկոն Շահբազյան
Աբովյանի N1 արհեստագործական պետական ուսումնարանի տնօրեն
