Այս տարրը միասին բացահայտել են անգլիացի քիմիկոս Մորիս Ուիլյամ Թրավորսը (1872 – 1961թթ.) և շոտլանդացի քիմիկոս, «Նոբել» մրցանակի դափնեկիր Ուիլյամ Ռամզեյը (1852 – 1916թթ) ՝ «կրիպտոն» տարրի բացահայտումից մի քանի օր անց:
Հեղուկ արգոնի գոլորշիացման ընթացքում գոյացող առաջին պղպջակները կալանելով՝ այս գիտնականները պարզում են, որ այդ գազի սպկտրը ցույց է տալիս նոր տարրի առկայությունը:
Ահա, թե ինչ է պատմել Ռամզեյն այս տարրի անունն ընտրելու մասին:
«Երբ մենք առաջին անգամ դիտարկում էինք դրա սպեկտրը՝ մեր կողքին էր իմ տասներկուամյա որդին:
-Հայրի՛կ, ասաց նա, - այդ գեղեցիկ գազի անունն ի՞նչ է:
-Դեռ չեն որոշել, - պատասխանեցի ես:
-Դա նո՞ր գազ է, - հետաքրքրվեց որդիս:
-Ոչ թե նոր, այլ՝ նոր բացահայտված, - առարկեցի ես:
-Այդ դեպքում կարելի է դրան «Novum» անունը տալ, - ասաց նա:
-Դա հարմար չէ, որովհետև «novum» -ը հունարեն բառ չէ, - պատասխանեցի ես: - Մենք դրա անունը «նեոն» կդնենք: «Նեոն» -ը հունարեն «նոր» է նշանակում:
Ահա այսպես է այս գազն իր անունը ստացել»:
Նկարում՝ Նեոնի ատոմների սպեկտրը էլեկտրական թույլ լիցքի դեպքում:
