Ի՞նչ գնահատական կտաք այն մարդուն, որը շատ հանգիստ կարող է մի բան ասել, իսկ մեկ րոպե անց իր այդ ասածի հակառակը պնդել:
Հին Չինաստանի Շու երկրամասում բացված հերթական տոնավաճառ է գալիս սայլը վահաններով ու նիզակներով բարձած մի տղամարդ: Որպեսզի շուկա բերված իր այս ապրանքները կարողանա իրացնել, վաճառականը, բնականաբար, սկսում է գովաբանել դրանք՝ հատկապես ընդգծելով իր ապրանքների բարձր որակ:
-Շատ կարծր, ամուր վահաններ գնե՛ք: Ո՛չ մի նիզակ, ո՛չ մի սուր չի կարող այս վահանները ծակել: Ամբողջ թագավորությունում դուք սրանցից պինդ վահան չեք գտնի:
Չնայած առևտրականի գովեստներին՝ ոչ ոք չէր գնում նրա վահանները:
Տեսնելով, որ վահանները չեն վաճառվում՝ առևտրականը սայլից հանում է մի քանի նիզակ ու սկսում է գովերգել դրանց անգերազանցելի որակը.
-Այդ դեպքում գնե՛ք այս նիզակները: Սրանց ծայրակալն այնքան սուր է ու կարծր, որ առանց դժվարության կծակի ցանկացած վահան:
Տոնավաճառ եկածներից մեկը նրան ասում է.
-Իսկ ի՞նչ տեղի կունենա, եթե փորձենք քո վահանը քո իսկ նիզակով ծակել:
Ներկայում էլ չինացիները, երբ ուզում են բնութագրել այն մարդուն, որն ինքն իրեն հակասում է խոսքով կամ գործով, հետևյալն են ասում.
«Նա իր վահանին իր նիզակով է խփում»: