«Մի անգամ Նովգորոդի բոյարները (տեղի սովորույթի համաձայն` միայն նրանք են զինծառայության կանչվում) պատերազմի են մեկնում թաթարների դեմ: Հաղթելով ճակատամարտում` նրանք վերադառնում են տուն, բայց ճանապարհին տեղեկանում են, թե տներում մնացած խոլոպները (ճորտերը) իրենց բացակայության ժամանակ տիրել են քաղաքներին, դաստակերտներին, տներին, կանանց և մնացյալ ամեն ինչին: Այս լուրն ապշեցնում է բոյարներին և, անասելի զայրացած իրենց ստրուկների այդ գարշելի արարքից, նրանք շտապում են օր առաջ տուն հասնել: Բայց Նովգորոդից ոչ հեռու նրանց դեմ է ելնում զինված ստրուկների բանակը: Բոյարները խորհուրդ են գումարում և որոշում են խոլոպների դեմ ոչ թե զենքով, այլ մտրակներով գնալ (տեղի սովորույթի համաձայն՝ ով ձի է հեծնում, անպայման մտրակ է վերցնում), որպեսզի նրանց հիշեցնեն իրենց ստրկական վիճակի մասին ու հնազանդեցնեն: Ահա այդպես առաջ ընթանալով ու թափահարելով մտրակները` նրանք նետվում են ստրուկների բանակի վրա: Մտրակների զորությունն իրենց մարմինների վրա բազմիցս զգացած ստրուկներն այն աստիճան են վախենում, որ հովվից քշված ոչխարների նման փախուստի են դիմում»:
Ջիլս Ֆլետչեր (1548 - 1611) , անգլիացի դիվանագետ
