Makaleler

Ողջու~յն հարգելի խմբակիցներ։ Ձեզ ողջունում է "Հյուրասրահ" նախագիծը
     Նախագծի հյուրն է սիրված ստեղծագործող և չքնաղ գեղեցկուհի Հայուհի Սուսաննա Ղազարյանը։
    
    

^{1. Ո°վ է Հայուհի Սուսաննա Ղազարյան ստեղծագործողը։}
    
    

Մարդ, ով ոչ միայն իր զգացողություններն է արտահայտում ստեղծագործությունների միջոցով, այլև փորձում է զգալ դիմացինի ցավը, հայրենիքում տիրող մտահոգիչ երևույթներն ու դարի արատավոր կողմերը...
     Իսկ թե որքանով է դա ինձ հաջողվում, ավելի ճիշտ կասի ընթերցողը:
    
    

^{2. Ի°նչ է մուսայի թռիչքը Ձեզ համար, եթերային ճախրանք, թե° ապրելակերպ:}
    
    

Ես հոգով թռչուն եմ...
     Ահա իմ կարգախոսներից մեկը.
     Հեյ, թռչնասպաննե'ր, բաց արեք բոլոր վանդակները. թռչունները ճախրելու համար են...
    
    

^{3. Ո°րն է գրողի գլխավոր սկզբունքը։}
    
    

Գրողի սկզբունքներից մեկը նոր ասելիք, նոր խոսք, նոր գաղափարներ հանդես բերելն է:
     Ներկայացնել կյանքն ինչպես որ է` ցույց տալով ոչ միայն կյանքի խնդիրները, այլև լուծումներ առաջարկել:
     Իսկ գլխավոր սկզբունքը` ծառայել հայրենիքին ու ժողովրդին` անձնվիրաբար:
    
    

^{4. Ե°րբ եք գրել Ձեր առաջին բանաստեղծությունը։ Ո°ր ոճերում եք ստեղծագործում ։ Ունե°ք տպագրված գրքեր։}
    
    

Առաջին ոտանավորս գրել եմ տասներեք տարեկանում:
     Իմ ստեղծագործությունների թեմատիկան բազմազան է. հայրենասիրություն, սիրերգություն, խոհափիլիսոփայական, թախծի ու տառապանքի, պանդխտության, ազատության ու արևային երգեր, որոնք տեղ են գտել իմ, , Վերադարձ դեպի արևը, , (2009), և, , Վաղը կգա..., , (2015) գրքերում:
    
    

^{5. Եթե մի 10 տարի առաջ հանդիպեիք Ձեզ, ի°նչ խորհուրդ կտայիք ինքներդ Ձեզ....}
    
    

Ապրել ոչ միայն ինքս ինձ համար, այլև ՀԱՅՐԵՆԻՔԻՍ, մերձավորներիս ու համայն մարդկության համար:
     Չգիտեմ քանի տարի առաջ էր, բայց երբ հասկացա գրիչ բռնելու լրջությունը, այս խորհրդով սկսեցի առաջնորդվել:
    
    

^{6. Ո°վ է Ձեր առաջին քննադատը և ինչպե°ս եք վերաբերվում քննադատությանը։}
    
    

Քննադատությանը, իհարկե առողջ, վերաբերվում եմ շատ դրական: Այն օգնում է գրողի ստեղծագործական առաջընթացին:
     Թումանյանի դուստրը` Նվարդը, հիշում է Թումանյանի կարծիքը քննադատության մասին. «Մեր գրականության մեջ թյուրիմացություններ շատ կան: Մի լավ քննադատի մեծ կարիք ունենք, որ ամեն մեկին իր տեղը ցույց տա, ամեն մեկին իր տեղը դնի»:
     Այո, վերջնական կարծիքը պրոֆեսիոնալ գրականագետինն է, որից հետո ես լրջորեն աշխատում եմ բանաստեղծություններիս վրա:
     Կարևորում եմ նաև գրողների և ընթերցողների կարծիքը:
    
    

^{7. Ըստ Ձեզ, ինչպե°ս կարելի է գտնել երջանկության բանալին։}
    
    

Երջանկության բանալին մարդու սրտում է: Ինչպես կասեր Մայր Թերեզան` ուզում ես երջանիկ լինել, եղիր...
    
    

^{8. Դասականներից ու°մ ստեղագործություններն են Ձեզ ավելի հոգեհարազատ։}
    
    

Գաղտնիք չէ, որ իմ ստեղծագործություններում թևածում են ՉԱՐԵՆՑՅԱՆ ՈԳԻՆ ու ՏԵՐՅԱՆԱԿԱՆ ՇՈւՆՉԸ:
     Բայց ինձ շատ հոգեհարազատ են նաև Նարեկացին, Քուչակը, Աբովյանը, Սայաթ-Նովան, Մեծն Թումանյանը, Բակունցը, Մահարին, Մեծարենցը, Դուրյանը, Վարուժանը, Թեքեյանը, Սևակը, Սահյանը, Վահագն Դավթյանը և այլք...
     Շատ հոգեհարազատ է դասականների և ժամանակակիցների խաչմերուկում կանգնած իմ Հրաչյա Սարուխանը:
    
    

^{9. Սիրու°մ եք ընթերցել, եթե այո, ո°ր գիրքն է հիմա իր մտքերով ներխուժել Ձեր հոգին։}
    
    

Մանկուց սիրել եմ գրքերի աշխարհը...
     Մասնագիտությամբ բանասեր եմ: Գիրքն իմ անբաժան ուղեկիցն է: Այժմ վերընթերցում եմ Համո Սահյանի, , Ինձ բացակա չդնեք, , գիրքը:
    
    

10.Ի°նչ հարցի շուրջ կցանկանայիք բարցրաձայնել, որը ցավոք ես չեմ հնչեցրել։
    
    

Այսօր ինչպիսի խնդիրներ ունի մեր հայրենիքը, և ովքեր պետք է զբաղվեն դրանցով...
     Խնդիրները բազմազան են. աղքատություն, արտագաղթ, կրթամակարդակի նվազեցում, ցածր աշխատավարձեր, մշակութային կյանքի անկում, գրական դաշտի ամայացում, թեպետ հիանալի գրողներ ունենք, բայց ասպարեզը տրված է օտարամոլ, ապազգային չգրողներին: Կոչումների արժեզրկում, տնտեսության անկում, անմիաբանություն, կաշառակերություն, համատարած անտարբերություն, որոնց մեծագույն պատճառը հիմնականում ոչ մասնագետներն են, ովքեր պաշտոններ են զբաղեցնում` ոլորտից ոչինչ չհասկանալով:
     Ղեկը տանք մասնագետներին և ճշմարիտ մտավորականներին, մեր երկիրը կարճ ժամանակահատվածում ծաղկում կապրի:
     Ահա ինձ մտահոգող հարցը և հարցի պատասխանը:
    
    

^{11. Խոսեք Ձեր հոգու ներկապնակի մասին։}
    
    

Հոգուս գույները աշնանային են. երբեմն վառ են ու արևային... երբեմն մթագնում են այդ գույները... երբեմն բացվում...
     Նրանք համահունչ են հոգուս տրամադրություններին:
    
    

^{12. Եթե հնարավորություն ունենայիք տպագրել մի գիրք, որտեղ պետք է ներկայացնեք արդի ստեղծագործողներին։ Ու° մ ստեղծագործությունները կտպագրեիք...}
    
     Ի°նչ խորհուրդ կտայիք արդի երիտասարդ ստեղծագործողներին ։

Մենք այսօր և' ավագ և' երիտասարդ սերնդի շատ տաղանդավոր ու հրաշալի գրողներ ունենք, որոնց ստեղծագործություններից մի հիանալի ժողովածու կկազմվի: Անվանական չնշեմ:
     Նոր ստեղծագործողներին խորհուրդ կտամ շատ կարդալ մեր դասականներին և միշտ ցուցամատը պահել ՀԱՅ ԳՐԱԿԱՆՈւԹՅԱՆ զարկերակին:
     Շարունակել դասականների ավանդույթները...
    
    

^{13. Ո°ր տողից է սկսվում Ձեր վաղվա օրը։}
    
    

Վաղվա օրը գրեթե միշտ նախապես պլանավորում եմ, բայց տնօրինում է Աստված:
    
    

^{14. Եթե հրաշագործ լինեիք...}
    
    

Իմ Հայրենի օրրանը կվերածեի դրախտի: Մեր Ընտրյալ ժողովուրդն արժանի է ապրել դրախտավայրում:
    
    

^{15. Համամիտ եք Մեծն Սևակի "Նորից չեն սիրում, սիրում են կրկին" արտահայտության հետ։}
    
    

Միանշանակ: Կարող ես կրկին սիրել և շատ ավելի ուժգին:
    
    

^{16. Որպես վերջաբան ներկայացրեք Ձեր ստեղծագործություններից ամենասիրվածը...}
    
    

Ցողե կաթիլը արցունքի նման
     Դանդաղ հոսում է վարդի այտերից,
     Ծագող արևը ձյունառատ ձմռան
     Ծաղկի բույրեր է ցողում երկնքից:

Ու խնդությամբ է լցվում կյանքը մեր,
     Օվկիան է դառնում մի կաթիլ ցողը,
     Ու ջերմանում է մեր հոգին անսեր,
     Նորից ճաքում է օրհնված հողը:

Բացե'նք դռները պաղ հոգիների,
     Թող հրավառվեն արևի բոցով,
     Մեր թոնիրներից թող աղոթք բուրի,
     Ու մեր ամբարը լիանա հացով:
    
    
    

^{Հարցազրույցը վարեց Լուսինե Նազարեթյանը}