Բյուրեղավանի գրադարանը հաճախակի է իր ընթերցողներին պարգևում կրթական, մշակութային ցերեկույթներ նվիրված գրողներին, ազգային ու պետական տոներին: Նպատակը՝ ընթերցանության խթանումն է: ՀՀ անկախության 26-րդ տարեդարձին նվիրված միջոցառումների շրջանակում Բյուրեղավանի գրադարանում կազմակերպվել էր գրական ցերեկույթ: Մասնակցում էին 5-7 դասարանի աշակերտները, ովքեր համարվում են գրադարանի ակտիվ ընթերցողները: Սկզբում գրադարանի աշխատակցուհիները երեխաներին ներկայացրեցին պատմական դրվագներ, թե ինչպես է մեր երկիրը հասել անկախության և ինչ դժվարություններով է կերտել հաղթանակը: Այնուհետև մասնակից երեխաները հանդես եկան ասմունքով, հայրենասիրական երգերով ու ասույթներով: Թեման ամբողջությամբ հայրենասիրությունն էր: Միջոցառման ընթացքում մասնակիցների կողմից եղան հարցեր ու քննարկումներ: Ավարտին դիտեցին ցուցահանդես՝ օրվա թեմայով:
