Պերուացի հնէաբանները սենսացիոն հայտնագործություն են արել . երկրի հարավում նրանք հայտնաբերել են հինավուրց թռչնի քարացած մնացուկներ, որն ապրել է 35 միլիոն տարի առաջ, հաղորդում է «ՌԻԱ Նովոստին» ՝ վկայակոչելով տեղի ԶԼՄ-ներին։
Խոսքը հսկայական հավալուսնի մասին է, որի բարձրությունը հասել է 1, 8 մետրի։ «Գտնված մնացուկների վրա նույնիսկ պահպանվել են մաշկի հետքերը, սա սենսացիոն հայտնագործություն է, քանի որ մենք չունենք որեւէ երկրում նման բանի փաստագրված տվյալներ», - ասել է հնէաբան Կլաուս Հենինգերը։
Թռչունի մնացուկները հայտնաբերվել են Իկա ծովափնյա տարածաշրջանի անապատում, որի միջով հունվարին անցնում էր «Դաքար - 2013» ռալլիի ճանապարհը։ Սա լրջորեն մտահոգում է պերուացի գիտնականներին, ովքեր համարում են, որ այդ մրցավազքը լուրջ վնաս է հասցնում գտածոներին։
Հենց Իկա տարածաշրջանի անապատային շրջաններում են ավելի վաղ բազմիցս հայտնաբերվել հնագույն կետերի, հսկայական շնաձկների ու պինգվինների մնացուկներ։
