Հայը` Հավերժի ճամփորդը, բազում անգամներ է սրածվել, բայց փյունիկի պես հառնել է և ի տխրոց մեր թշնամիների` ապացուցել է, ապացուցելու է իր գոյի հավերժությունը:
Հայոց ցեղասպանության 100-րդ տարելիցի «Հիշում եմ և պահանջում» կարգախոսի ներքո Երևանի Խ.Աբովյանի անվան N 84 հիմնական դպրոցում տեղի են ունեցել մի շարք միջոցառումներ:
Յուրաքանչյուր դասարանում 10.04.2015 թվականին մեկական դասաժամ նվիրվել է անմոռուկների պատրաստմանը: 17.04.2015 թվականին ընթերցվել է հայոց ցեղասպանության 100-րդ տարելիցի համահայկական հռչակագիրը:
Ապրիլի 15-ին մի խումբ աշակերտներ տնօրեն Ա.Էլոյանի, փոխտնօրեններ Լ.Հարությունյանի և Ս.Մողրովյանի և մի խումբ ուսուցիչների ուղեկցությամբ եղավ Ծիծեռնակաբերդում: Հուշահամալիրի մոտ հանդերձներով ստեղծեցին հավերժության խորհրդանիշ Արարատի և հայոց ցեղասպանության 100-րդ տարելիցի խորհրդանիշ անմոռուկի պատկերները:
Ապրիլի 18-ին դպրոցի 38 աշակերտներ մասնակցեցին «Հայ ասպետ» կրթադաստիարակչական բարեգործական հիմնադրամի նախաձեռնությամբ կազմակերպված «Դարձիր, իմ Անի» վերնագրով մշակութացույցին (ֆլեշ-մոբ):
Դպրոցում կազմակերպվել են բաց-դասեր` նվիրված Մեծ եղեռնին: Միջոցառումների շարքից անմասն չէր մնացել տարրական դպրոցը: Ապրիլի 17-ին Լ.Հակոբյանը ներկայացրեց Սուրեն Մուրադյանի «Մագաղաթներ» ստեղծագործությունը: Միջոցառումը իր ներկայությամբ պատվել էր հեղինակը:
Հայոց լեզվի և գրականության ուսուցչուհի Ա.Հովհաննիսյանը կազմակերպել էր գրական-երաժշտական կոմպոզիցիա, որը կրում էր «Սիրտս կոտրեցին սրով, մեկ է ապրեցի սիրով» խորագիրը:
Միջոցառումների շարքն ամփոփվեց 22.04.2015 թվականին: Դպրոցի ռադիոհանգույցով, աշակերտների նախաձեռնությամբ, հայտարարվեց լռության րոպե` հարգելու 1.5 միլիոն զոհերի հիշատակը:
