Աշխարհի ամենաբարի մարդիկ
Ուզում եմ պատմել մի կրոնական ուղղության մասին, որն ինձ շատ է հուզել և ոգեշնչել: Կարծում եմ, որ քանի դեռ այդպիսի մարդիկ ապրում են երկրագնդի վրա, ուրեմն լուսավոր ապագայի հույս այնուամենայնիվ կա: Կրոնական այդ ուղղությունը կոչվում է Բիշնոի: Հնդկաստանի Ռաջաստան նահանգում, անապատում, ապրում են աշխարհի ամենաբարի մարդիկ` բիշնոի ցեղը: Եթե բուդդիզմը համարվում է բարության և հանդուրժողականության կրոն, ապա բիշնոին կարելի է համարել նույն բուդդիզմը` հարյուրապատկված: Այդ կրոնական ուղղությունը սկիզբ է առել 15-րդ դարում և միաժամանակ կարելի է համարել առաջին էկոլոգիական գիտության հիմքը: Այդ ժամանակ հոգևոր առաջնորդ Ջամբխեշվարը դարձել էր չտեսնված երաշտի ականատեսը, որը տևել էր մի քանի տարի, և դրա հետևանքով մարդիկ ասես խելագարվել էին: Նրանք դաժանաբար կտրում էին բոլոր ծառերը, սպանում կենդանիներին, որպեսզի սովից չմեռնեն: 33 –ամյա Ջամբխեշվարը իր ցեղակիցներին կոչ էր անում հետևել 29 պատվիրաններին և դադարեցնել ոչնչացնել շրջակա աշխարհը, այլապես նրանց մահ է սպասվում: Արդեն 21-րդ դարում Ջամբխեշվարը ուներ մոտ 600 000 հետևորդներ, որոնք իրենց անվանում էին "բիշնոի" (բիշ – 20, նոի – 9): Այդ ցեղի ներկայացուցիչների մոտ ընդունված է ամեն տարի բերքի 10 տոկոսը տալ վայրի կենդանիներին, հատկապես եթե երաշտ է լինում: Վայրի կենդանիները նրանց համար դառնում են կարծես ընտանիքի անդամներ, օրինակ` եթե եղնիկի ձագը կորցրել է մորը, նրան շշի օգնությամբ կաթով են կերակրում, իսկ եթե փոքրիկը հրաժարվում էր շշից, ապա կանայք են նրան կերակրում կրծքով: Ի դեպ, այդ ցեղը միակն է Հնդկաստանում, որը հրաժարվել է դիակիզման արարողությունից, որպեսզի խնայի փայտը: Ջեռուցման համար նրանք օգտագործում են միայն այն ծառերի փայտը, որոնք մահացել են "բնական մահով", արևի ճառագայթներից չորացել են կամ կոտրվել քամուց: Ամեն տարի այդ ցեղի տասնյակ ներկայացուցիչներ են զոհվում` որսագողերից վայրի կանդանիներին պաշտպանելիս: 18-րդ դարում մախարաջ Ջոդպուրան հրամայեց իր զինվորներին խեջլի ծառատեսակից գերաններ կտրել` նոր պալատի կառուցման համար: Բիշնոյի ցեղի մարդիկ գրկել էին ծառերը, որպեսզի փրկեն դրանք, բայց զինվորները դաժանաբար կտրում էին ծառերը մարդկանց հետ միասին: Այդպես մի քանի օրում 350 մարդ զոհվեց: Բիշնոի հետևորդ Ռանա Ռամը 38 տարվա ընթացքում անապատում 22 000 ծառ է տնկել, յուրաքանչյուրը խնամելով ու ջրելով: "Ես երկու տարվա ընթացքում կկիսեմ նրանց հետ իմ բաժին ջուրը, մինչև նրանք ամրանան, նրանք իմ զավակներն են"-ասում է Ռանա Ռամը: Նրան անվանում են ծառերի բարեկամ: Բիշնոի 29 պատվիրանները 1. Հարկավոր է մորն ու երեխային առանձնանալու հնարավորություն տալ` ծննդաբերությունից հետո 30 օր: 2.Դաշտանի առաջին 5 օրերի ընթացքում ազատել կնոջը ցանկացած բնույթի աշխատանքից: 3. Ամեն օր վաղ առավոտյան լվացվել: 4. Պահպանել մարմնի մաքրությունը և հոգու մաքրությունը: 5. Օրը երկու անգամ մեդիտացիա անել` լուսաբացին և մայրամուտին: 6. Ամեն օր երգել Աստծուն ուղղված օրհներգեր և փառաբանել նրա բարությունը: 7. Ամեն օր կատարել զոհաբերություններ սուրբ կրակին, մաքուր սրտով, լցված բարությամբ ամեն մի կենդանի էակի, բնության և ողջ աշխարհի հանդեպ և Աստծու հանդեպ երախտագիտությամբ: 8. Ջուրը զգուշորեն ֆիլտրել, մաքրել կաթն ու ցախը օգտագործելուց առաջ, որևէ միջատի պատահաբար այրելուց կամ սպանելուց խուսափելու համար: 9. Խոսելիս լինել ուշադիր և գիտակցել ամեն մի բառի կարևորությունը: 10. Կարողանալ ներել: 11. Կարողանալ կարեկցել: 12. Չգողանալ: 13. Ուրիշի թիկունքում չչարախոսել: 14. Չստել: 15.Չդատապարտել մերձավորին: 16. Նորալուսնի գիշերը մեդիտացիա անել և պաս պահել: 17. Կրկնել Վիշնուի սուրբ անունը: 18.Կարեկցել բոլոր կենդանի էակներին: 19. Չոչնչացնել կանաչ (կենդանի) ծառերը: 20. Զսպել քո մեջ ագահությունը, դյուրագրգռությունը, ժլատությունը: 21. Ինքդ քեզ համար սնունդ պատրաստիր և մի ընդունիր անմաքուր սնունդ (օրինակ` միս): 22. Ծերացած ոչխարներին և այծերին առանձին կացարան հատկացնել` դրանց սպանդանոց չուղարկելու համար: 23. Ցուլերին չամորձահատել: 24. Չօգտագործել և չաճեցնել օպիում: 25. Չօգտագործել և չաճեցնել ծխախոտ: 26. Չօգտագործել և չաճեցնել կանեփ: 27. Չօգտագործել ալկոհոլ: 28. Չուտել միս, պաշտպանել և կերակրել վայրի կենդանիներին: 29. Չկրել կապույտ գույնով ներկված հագուստ (Հին Հնդկաստանում այդ գույնը ստանում էին ինդիգո ծառից, բացի այդ կապույտը մահվան գույնն է): Իհարկե թվում է, թե պատվիրանները պիտի դասավորված լինեին ըստ կարևորության և այդ իմաստով ճիշտ չեն դասավորված, բայց դա այդպես չէ: Պարզապես դրանք հավասարապես կարևոր են Բիշնոի համար: |
Abone ol ve malalelerin yayınla: