Հռոմեական կայսրության հիմնադիր, «հայրենիքի հայր», «աստվածային» հռչակված Օկտավիանոս Օգոստոսը (մ.թ.ա. 63 – մ.թ. 14 թթ.) երբ թոռանը՝ Գայոսին մ. թ.ա. 2 թվականին ուղարկել է Հայաստան՝ Արևելքի գործերը տնօրինելու, նրա համար, ըստ հռոմեական դարաշրջանի հույն գրող և փիլիսոփա Պլուտարքոսի վկայության, աստվածներից երեք բան է խնդրել՝ Տիգրան Մեծին հնազանդեցրած և «մեծ» պատվանունի արժանացած Պոմպեոս զորավարի բարությունը, Ալեքսանդր Մեծի քաջությունը և այն հաջողությունը, որ ուղեկցել է իրեն ամբողջ կյանքում: Բայց աստվածներն ականջալուր չեն եղել կայսրության տիրակալի խնդրանքին, և, բնականաբար, Գայոսը չի արժանացել իր պապի բախտին և հաջողությունը նրա ուղեկիցը չի եղել. Արևելք գալուց ընդամենը երկու տարի անց նա ծանր վիրավորվել է և 4 թվականի փետրվարի 21-ին մահացել է:
