Ի Տեր ննջեց Տեր Կորյուն ավագ քահանա Մարտիրոսյանը։
Աղոթք և Աստվածային մշտառաք օրհնություն Տեր Հոր բարի հիշատակին
Սրտի ցավով տեղեկացնում ենք, որ սույն թվականի հոկտեմբերի 1-ին ի Տեր ննջեց Արարատյան Հայրապետական Թեմի Սուրբ Երրորդություն եկեղեցու հոգևոր սպասավոր Արժանապատիվ Տ. Կորյուն Ավագ քահանա Մարտիրոսյանը:
Տեր հայրը ծնվել է 1956թ. հուլիս 16-ին, Արմավիրի մարզի Ոսկեհատ գյուղում:
1971-1979թթ. սովորել է Սուրբ Էջմիածնի Հոգևոր ճեմարանում, 1982-1985թթ. շարունակել հոգևոր ուսումնառությունը մերձմոսկովյան Զագորսկ քաղաքի Հոգևոր ակադեմիայում: 1991թ-ի ապրիլի 7-ին ձեռամբ Արարատյան Հայրապետական Թեմի Առաջնորդական Փոխանորդ Տ. Գարեգին արք. Ներսիսյանի (Ն. Ս. Օ. Տ. Տ. Գարեգին Բ Ամենայն Հայոց Կաթողիկոս) ձեռնադրվել է ամուսնացյալ քահանա:
1991-2019թթ. ծառայել է Արարատյան Հայրապետական Թեմի առաջնորդանիստ Ս. Սարգիս, Նոր Նորքի Ս. Սարգիս, Զորավոր Սուրբ Աստվածածին, Սուրբ Երրորդություն եկեղեցիներում:
1990-2000թթ. հոգևոր երաժշտություն է դասավանդել Սևանի Վազգենյան հոգևոր դպրանոցում, 2000-2019թ.թ.՝ Մայր Աթոռ Սուրբ Էջմիածնի Գևորգյան Հոգևոր ճեմարանում: Նվիրյալ ծառայության համար Ն. Ս. Օ. Տ. Տ. Գարեգին Բ Ամենայն Հայոց Կաթողիկոսի կողմից 2011 թ. Տեր հորը շնորհվել է Ավագ քահանայության պատիվ:
Հովվական ծառայությանը զուգընթաց Տեր հայրը կազմել և հրատարակության է ներկայացրել բազմաթիվ շարականների, ժամերգությունների, Ավագ Շաբաթվա և ծիսական այլ արարողությունների եվրոպական նոտագրությունները:
Ամուսնացած է, ունի 3 զավակ:
Տեր Հոր հոգեհանգիստը տեղի կունենա Էջմիածնի Սուրբ Շողակաթ վանքում, հոկտեմբեր 3-ին, ժամը 18: 00-ին։
Սուրբ Պատարագի, վերջին օծման և հուղարկավորության արարողությունները՝ նույն վայրում, հոկտեմբեր 4-ին, սկիզբը՝ 10: 30-ին:
Ցավակցում ենք Տեր Հոր ընտանիքին ու հարազատներին և մաղթում Սուրբ Հոգու սփոփանքն ու մխիթարությունը...