Статьи

     13.10.2018թ. Կապանի N13 հիմնական դպրոցում տեղի ունեցավ Սուրբ Թարգմանչաց տոնի և Մեսրոպ Մաշտոցի հուշարձանի բացման արարողությունը, որին մասնակցում էին Կապանի N13 և N1 հիմնական դպրոցների աշակերտները: Դպրատան բակում տեղադրված Մեսրոպ Մաշտոցի տուֆե քանդակի բացման պատիվը տրվեց Արժանապատիվ Տեր Վահան քահանա Հեբոյանին:
     Սուրբ Թարգմանչաց տոն, լեզվի ու մշակույթի տոն, խորհրդանշում է հայոց գրերի գյուտը, Աստվածաշնչի հայերեն առաջին թարգմանությունը, թարգմանչաց շարժումն ու հայ դպրության սկիզբը։
     «Ճանաչել իմաստությունն ու խրատը, իմանալ հանճարի խոսքերը», որ նշանակում է գիտակված ապրել Աստծո խոսքով. ճանաչել Նրան, լսել Նրան, Կատարել Նրա խոսքը:
     «Հազար ու մի փոթորիկներ անցան հայ ժողովրդի վրայով, բայց ոչ մի արհավիրք չկարողացավ հայ ժողովրդի հոգուց խլել իր սեփական մայրենի լեզուն և իր արյունով գնված քրիստոնեական հավատքը, որ մեր պապերը կտակեցին մեզ: Նրանք կտակեցին չբաժանվել մեր Մայր եկեղեցուց, որ ծննդավայրն է հայ լեզվի և հայ մշակույթի: Այսօր մեզ մնում է աղոթել Աստծուն և մաղթել, որ Թարգմանչաց ոգին և նրանց շնորհները մնան հայ ազգի յուրաքանչյուր անհատի հետ: » իր խոսքում նշեց Տեր Վահան քահանա Հեբոյանը:
     Գաղտնիք չէ, որ արվեստի յուրաքանչյուր գործիչ իր ներաշխարհից, էությունից, մտքերից ու զգացմունքներից գոնե մի փոքրիկ կտոր է դնում իր աշխատանքներում: Այս մտքով առաջնորդվելով՝ նա փորձեց իր արձանների շնորհիվ բացահայտել երիտասարդ քանդակագործի էությունը:
     2016թվականին երիտասարդ նկարիչ-քանդակագործների սիմպոզիումում Հայկական կարմիր տուֆից կերտած Մեսրոպ Մաշտոցի արձանի հեղինակն է ճանաչված քանդակագործ Արման Սամվելի Ասատրյանը: Քարի ընտրությունը պատահական չի եղել, քանի որ այն ի զորու է արտահայտել լույսի և ստվերի ներդաշնակությունը: Արձանի տեղադրումը տարիների երազանք էր, և այսօր այն իրականություն է:
     Հայաստանում և սփյուռքում Մաշտոցի անունով են կոչվում պետական ու հասարակական հիմնարկներ, դպրոցներ, Մաշտոցի անունն է կրում հայկական ամենահարուստ ձեռագրատունը Մատենադարանը։ Սյունիքի մատույցում գտնվող Կապանա ոստանը չէր կարող չունենալ իր դպրոցը, որտեղ պետք է դրոշմվեր հավատն ու պատմությունը, լույսն ու երազը: Իսկ երբ Մաշտոց սրբի արձանը լուավոր խաչի ուղեկցությամբ հանգրվանեց Կապանի N13 հիմնական դպրոցում, այս պուրակը դարձավ աղոթատեղ, դպրանոց: Շնորհակալ ենք Արման Ասատրյանին, որ արժանի և հարմար վայր ընտրեց մեր դպրոցը: Դարերով կգործի Մեսրոպ Մաշտոցի անունը կրող այս պուրակը` Ձեր և կապանցիների սիրո և խնամքի ներքո:
     ՄԿԱ գծով փոխտնօրեն Ժաննա Վարդանյան