1923 թվականի օգոստոսի 2-ին Սան Ֆրանցիսկոյի «Փալաս» հյուրանոցում մահացել է ԱՄՆ 29-րդ Նախագահ Ուորեն Հարդինգը:
Նախագահի օրգանիզմում սննդային թունավորման նշաններ են հայտնաբերվել, և, ի լրումն դրա, նա թոքաբորբ է ունեցել: ԱՄՆ ռազմածովային նավատորմի բժիշկներից մի քանիսը, որոնք ընդգրկված են եղել նախագահի բուժման գործում, եզրակացրել են, թե նախագահի անձնական բժիշկը՝ հոմեոպատ (նմանաբույժ) Չարլզ Սոյերը, սխալ ախտորոշում է կատարել, որը հանգեցրել է 57-ամյա Հարդինգի՝ սրտի կաթվածից մահվան: Բժիշկը, սակայն, չի պատժվել: Սոյերի խորհրդով՝ Հարդինգի կինը՝ Ֆլորանսը, թույլ չի տվել, որ դիահերձում կատարվի:
Թաղումից անմիջապես հետո շշուկներ են տարածվել այն մասին, թե նախագահը դավադրության զոհ է դարձել, քանի որ մահվան հանգամանքների հետաքննություն չի կատարվել:
Ֆլորանս Հարդինգն ու Չարլզ Սոյերը մեկ տարի անց մահացել են:
1930 թվականին անկախ հետազոտող Գաստոն Մայնսը հրատարակել է «Նախագահ Հարդինգի տարօրինակ մահը» վերտառությամբ մեծ աղմուկ հանած գիրքը, որում ապացուցել է, որ մի շարք անձինք, ներառյալ Ֆլորենս Հարդինգը, նախագահին թունավորելու պատճառ են ունեցել: Սակայն, այս գիրքը և դրա հեղինակի անձը լրատվամիջոցները խիստ քննադատության են ենթարկել, և ներկայում Մայնսի եզրակացությունները բացարձակ սպեկուլյացիա են համարվում:
