Covid-19 կոչվող չարիքը խաթարեց ոչ միայն մոլորակի չափահաս բնակչության բնականոն կյանքն, այլ նաև հասցրեց առաջացնել դպրոցահասակ երեխաների ձանձրույթն ու գողացավ նրանցից կյանքի մի գարուն։
7-րդ դասարանի աշակերտ
Գայայան Տիգրանն այս թեմայով շարադրություն է գրել, որը կներկայացնենք ստորև՝
Գարունն իր հետ բերում է նոր կյանք։ Գարնան հետ արթնանում է բնությունը․ ծաղկում են ծառերն ու ծաղիկները, տաք երկրներից վերադառնում են թռչունները, դաշտերում ու արտերում սկսվում են գյուղատնտեսական աշխատանքներ, իսկ խոր քնած կենդանիներն արթնանում են։
2020 թվականի գարունը․․․
Այս գարունը նման չէ այն բոլոր գարուններին, որոնց մենք սպասել ենք անհամբեր։ Այս գարունն իր հետ ցավ, անհանգստություն ու կորած ժպիտներ բերեց։
Մոլորակի ողջ բնակչությունը փակեց դուռ-լուսամուտ, փակեց դեմքը և թույլ չտվեց գարնանը մոտենալ իրեն։ Ինչու՞, ո՞վ է մեղավոր։ Բնությու՞նը։ Ո՛չ, մարդն է մեղավոր։ Մարդը նեղացրեց բնությանը և բնությունն ինքն էլ զարմացավ, որ այս տարվա գարնանը դիմավորող չեղավ։
Կորսված էր 2020 թվականի գարունը․․․
