Ինձ ոչի՜նչ պետք չէ գրել հենց այնպես,
Երբ սիրտդ լո՜ւռ է, բայց լեզուդ կայտա՛ռ,
…Լեզվի կծածը երբե՜ք չի բուժվել,
Սրտի լռությունը պատի՜ժ է դաժան:
Եվ ո՛չ էլ պետք է խոստանալ իզուր,
Երբ որ ուզում ես գլո՜ւխդ ազատել,
… Անիմաստ տված ամե՜ն մի խոստում
Հի՜ն շորի նման կարող է կառչել:
Պե՜տք չէ բառերով հեռու տանել ինձ,
Ենթատեքստերով անել խեղդամա՛հ,
… Քո կողմից գրված ամե՜ն մի բառից-
Բացվում է մի նո՜ր փակված պատուհան:
…Ու ծաղիկնե՜ր են պատուհաններին,
…Ու ծաղիկների ամե՜ն մի թերթիկ՝ մի պատրա՜նք,
Ա՜յլ կերպ են բուրում նվիրված ծաղիկները,
Չնվիրվածնե՜րը՝ չե՛ն բուրում իսպառ: